اوویرین یا بیضہ دانی کا کینسر

گلوبل کینسر آبزرویٹری کی رپورٹ کے مطابق 2020 میں پاکستان میں اوویرین کینسر کے 4000 سے زائد نئے کیسز سامنے آئے اور اس کے باعث تقریباً 3000 اموات ہوئیں۔ آگہی نہ ہونے کے باعث خواتین کی بڑی تعداد بر وقت ڈاکٹر کے پاس نہیں جاتی جس کی وجہ سے اس مرض کی شرح میں تیزی سے اور مسلسل اضافہ ہو رہا ہے۔

اوویرین کینسر کی اقسام 

بیضہ دانی (Ovary) حمل میں بنیادی کردار ادا کرتی ہے۔ اسی حصے سے وہ انڈا خارج ہوتا ہے جو فیلوپین ٹیوبز کے ذریعے سفر کر کے یوٹرس یعنی بچہ دانی تک پہنچتا ہے۔ بچہ دانی میں یہ کینسر اس وقت ہوتا ہے جب  کینسر زدہ خلیے ایک یا دونوں بیضہ دانیوں کی قریبی یا بیرونی تہہ میں بنتے ہیں اور یہاں موجود صحت مند خلیوں کو نقصان پہنچانے لگتے ہیں۔

خلیے کی جس قسم سے اس کینسر کا آغاز ہوتا ہے وہی کینسر کی قسم کا تعین کرتا ہے۔ قسم معلوم ہونے کے بعد طریقہ علاج کے تعین میں آسانی ہوتی ہے۔ اس سرطان کی اقسام یہ ہیں:

بیرونی جھلی کا سرطان (Epithelial ovarian cancer) اس مرض کی سب سے عام قسم ہے۔ اس میں سرطان زدہ خلئے بیضہ دانی یا فلوپین ٹیوب کی بیرونی جھلی میں بنتے ہیں۔

ایسے ٹشوز جو عضو کو مخصوص شکل یا ساخت دیتے ہیں، سٹرومل (stromal ) ٹشوز کہلاتے ہیں۔ ان ٹشوز میں ہونے والے کینسر کی تشخیص بیضہ دانی کے سرطان کی دوسری اقسام کے مقابلے میں ابتدائی مرحلے پر ہی ہوجاتی ہے۔

اووری کے کینسر کی ایک قسم(Germ cell tumors) بڑی عمر کی خواتین کے بجائے نو عمر لڑکیوں کو زیادہ متاثر کرتی ہے۔

بیضہ دانی کے کینسر کا سبب بننے والے عوامل

٭غیر شادی شدہ خواتین کے علاوہ ایسی شادی شدہ عورتوں میں اس کی شرح ہے جن کا صرف ایک بچہ ہو یاجو بے اولاد ہوں۔ بانجھ پن کے خاتمے کے لئے ادویات استعمال کرنے والی خواتین میں بھی اس کے امکانات زیادہ ہوتے ہیں۔

٭وہ خواتین جنہیں ماہانہ ایام میں بے قاعدگی کی شکایت ہو ۔

٭جن خواتین کی والدہ‘بہن یابیٹی کو بیضہ دانی کا سرطان ہواہو‘یا خونی رشتے داروں میں سے کسی کو چھاتی یا بیضہ دانی کا سرطان رہا ہو‘ انہیں بھی اس سلسلے میںمحتاط ہونے کی ضرورت ہے۔

٭سبھی خواتین کو بیضہ دانی میں کینسر ہونے کا خطرہ ہوتا ہے، لیکن بوڑھی خواتین میں اس بیماری کا امکان زیادہ ہوتا ہے۔

٭زیادہ وزن یا موٹاپا ہونا۔

٭تاخیر سے بچے پیدا ہونا یا اولاد نہ ہونا ۔

ِ٭مینوپاز کی عمر کے بعد ہارمون تھیراپی لینا۔

٭ سگریٹ نوشی کی عادت ہونا۔

اوویرین کینسر کی علامات 

بیضہ دانی کے کینسر کی علامات عموماً اس وقت ظاہر ہوتی ہیں جب مرض کافی زیادہ بڑھ چکا ہو۔ ان میں پیٹ میں پانی بھرجانا اور ناف کے نچلے حصے میں درد رہنا زیادہ عام ہیں ۔اس وجہ سے مریضہ کو کافی تکلیف کا سامنا کرنا پڑتا ہے۔ پیٹ پھولاہوا محسوس ہونا اور یوں لگنا کہ پیٹ میں کوئی رسولی ہے،تھوڑا ساچلنے پر سانس پھولنا، معدے اور آنتوں کے امراض کی شکایت ہونا بھی اس کی علامات ہیں۔

اس سرطان کی شکارخواتین کو عموماً تھکاوٹ، بدہضمی، کمرمیں درد، قبض اور بے قاعدہ ایام کا مسئلہ بھی ہوسکتا ہے۔ بھوک نہ لگنا، بنا کچھ کھائے پیٹ کا بھرا ہوا محسوس ہونا، پیڑو یا پیٹ کی جگہ درد یا دباؤ محسوس ہونا، بار بار پیشاب آنا وغیرہ بھی اس فہرست میں شامل ہیں۔

بیضہ دانی کے کینسر کا علاج 

اس مرض کی تشخیص کے لئے پیٹ کا معائنہ کیا جاتا ہے۔ اگر معائنے کے دوران پیٹ میں پانی یا رسولی محسوس ہو تو ڈاکٹر  الٹراساؤنڈ اور خون کے ٹیسٹ تجویز کرتا ہے۔ اگر کینسر کا خدشہ ہو تو سی ٹی سکین، ایم آر آئی اور دیگر ٹیسٹ کئے جاتے ہیں۔

ریڈی ایشن، کیموتھیراپی یا سرجری کا فیصلہ مریض کی عمر،حالت اور مرض کے پھیلاؤ کے مطابق ڈاکٹر ہی کرتا ہے۔ اس کے علاوہ سی اے 125 بلڈ ٹیسٹ بیضہ دانی کے کینسر زدہ خلیوں کی پیدا کردہ پروٹین کی سطح جاننے کے لئے کیاجاتا ہے۔ اس سرطان کی علامات ظاہر نہ ہونے یا اس کے کم امکان کی صورت میں بالعموم یہ ٹیسٹ نہیں کروایا جاتا۔

کرنے کے کام 

٭بیضہ دانی کے کینسر کی علامات ظاہر ہوں تو ماہر امراض نسواں سے رابطہ کریں۔

٭حاملہ اور دودھ پلانے والی خواتین میں اس مرض کی شرح کم ہے۔ تاہم وہ خواتین جو مینوپاز کے مرحلے سے گزر رہی ہوں، وہ ایام کی بندش کے بعد ہر سال اپنا معائنہ کروائیں تاکہ مرض کی جلد تشخیص ہوسکے۔

٭مناسب وزن کو برقرار رکھیں۔

٭ مینوپاز کی عمر کے بعد ہارمونز کی تبدیلی کی تھیراپی نہ لیں۔

٭مانع حمل ادویات کا استعمال ڈاکٹر کے مشورے سے کریں۔

٭متوازن خوراک لیں اور صحت مند طرز زندگی اپنائیں۔

٭تولیدی اعضاء کے اردگرد پاؤڈر،پرفیوم اور دیگر کاسمیٹکس کے استعمال سے گریز کریں۔

Ovarian cancer, what are the causes of ovarian cancer, symptoms of ovary cancer, ovaries, cancer, women health, female health, shifa news, health, baiza daani ka cancer, women reproductive health