دبئی کے ایک ہسپتال کی طرف سے جاری ڈیٹا کے مطابق دل کے تقریباً نصف مریضوں کی عمریں 31 سے 50 سال رہیں۔ ان میں جنوبی ایشیائی مریضوں کی تعداد نمایاں تھی۔
گلف نیوز کے مطابق ایسٹر ہسپتال منخول نے 3,500 سے زائد مریضوں کے ڈیٹا کا تجزیہ کیا۔ ان میں 90 فیصد سے زیادہ کا تعلق جنوبی ایشیاء سے تھا۔ بھارتی شہری 65 فیصد سے زیادہ تھے، جس کے بعد پاکستانی اور فلپائنی مریضوں کی تعداد نمایاں رہی۔
6,000 سے زائد مریضوں کے الگ تجزیے میں 35 فیصد سے زیادہ کی عمر 41 سے 50 سال تھی۔ مزید 15 سے 20 فیصد مریض 31 سے 40 سال کے تھے۔ تقریباً 30 فیصد کی عمر 51 سے 60 سال تھی۔ 10 سے 15 فیصد مریض 60 سال یا اس سے زیادہ عمر کے تھے۔
شعبہ امراضِ قلب کے سربراہ ڈاکٹر نوید احمد نے نوجوانوں میں آگاہی اور احتیاط پر زور دیا۔ انہوں نے دل کی بیماریوں کی جلد تشخیص اور بروقت علاج کو بھی اہم قرار دیا۔
