شوگر کے مریض روٹی نہ چھوڑیں، درست آٹا منتخب کریں

 ذیابیطس کی تشخیص کے بعد بہت سے افراد روٹی چھوڑنے کے بارے میں سوچتے ہیں۔ تاہم ماہرین کے مطابق روٹی مکمل چھوڑنے کے بجائے درست آٹے اور روٹی کی مناسب مقدار کا انتخاب اہم ہے۔

امریکن ڈائبیٹیز ایسوسی ایشن زیادہ فائبر اور کم پراسیس شدہ کاربوہائیڈریٹس کو ترجیح دینے کا مشورہ دیتی ہے۔ اس لحاظ سے جو، چوکر والی گندم، باجرہ اور جوار سے بنی روٹیاں بہتر انتخاب ہو سکتی ہیں۔ جو میں موجود بیٹا گلوکان فائبر کھانے کے بعد خون میں شوگر تیزی سے بڑھنے سے روکنے میں مدد دے سکتا ہے۔ بیسن بھی پروٹین اور فائبر کا اچھا ذریعہ ہے۔

ماہرین کے مطابق آٹے کے انتخاب کے ساتھ باقی غذا کا خیال رکھنا بھی ضروری ہے۔ ہر مریض کی ضروریات مختلف ہوتی ہیں، اس لیے خوراک میں بڑی تبدیلی ڈاکٹر یا ماہر غذائیت کے مشورے سے کریں۔