پاکستان میں میڈیکل ٹورازم کے فروغ کے لیے تین مرحلوں پر مشتمل منصوبہ تیار کیا جا رہا ہے۔ اس کا آغاز اسلام آباد سے ہو گا۔
منصوبہ ایس آئی ایف سی، سی ڈی اے اور ایم ایس کے گروپ کے تعاون سے تیار کیا جا رہا ہے۔ پہلے مرحلے میں موجودہ سہولیات کے ذریعے طبی خدمات فراہم کی جائیں گی۔ دوسرے مرحلے میں ان خدمات کے لیے مخصوص عمارت مختص کی جائے گی۔ تیسرے مرحلے میں 25 ہزار مربع فٹ پر مشتمل میڈیکل ٹورازم مرکز قائم کرنے کی تجویز ہے۔ یہاں علاج کے ساتھ رہائش، ایئرپورٹ سے آمدورفت اور سیاحتی خدمات بھی فراہم کی جائیں گی۔ ابتدا میں کاسمیٹک اور پلاسٹک سرجری، ہیئر ٹرانسپلانٹ اور لیزر علاج پر توجہ دی جائے گی۔ منصوبے کا مقصد بیرونِ ملک سے مریضوں کو علاج کے لیے پاکستان کی جانب راغب کرنا ہے۔
منصوبہ سازوں کے مطابق پاکستان میں بعض علاج دیگر ممالک کے مقابلے میں کم خرچ ہو سکتے ہیں۔ منصوبے سے زرمبادلہ کے ساتھ صحت، سیاحت اور دیگر متعلقہ شعبوں میں کاروباری مواقع بڑھنے کی توقع ہے۔
