ہیپاٹائٹس سی، 12 سال سے زائد عمر کے تمام شہریوں کی سکریننگ کا فیصلہ

حکومت نے پاکستان میں ہیپاٹائٹس سی کے خلاف ملک گیر مہم کے تحت 16 کروڑ افراد کی سکریننگ کا فیصلہ کیا ہے۔ 12 سال سے زائد عمر کے تمام شہریوں کو اس پروگرام میں شامل کیا جائے گا۔

سماء نیوز کے مطابق وزیراعظم انسدادِ ہیپاٹائٹس پروگرام کے ڈائریکٹر ڈاکٹر ضیا داوڑ نے یہ معلومات فراہم کیں۔ ان کے مطابق ملک میں ہیپاٹائٹس سی کے مریضوں کی تعداد ایک کروڑ 10 لاکھ سے تجاوز کرچکی ہے۔

پروگرام کے تحت شہریوں کی سکریننگ کے بعد ضرورت پڑنے پر مزید ٹیسٹ کیے جائیں گے۔ ہیپاٹائٹس سی کی تشخیص ہونے پر علاج کے اخراجات بھی حکومت برداشت کرے گی۔

وفاقی ملازمین کی سکریننگ کے لیے تمام وزارتوں میں کیمپس قائم کیے جائیں گے۔ 18 سرکاری ہسپتالوں میں سکریننگ اور علاج کی سہولت فراہم کردی گئی ہے، جبکہ نجی ہسپتالوں میں بھی یہ سہولت شروع کرنے پر غور جاری ہے۔