سینیٹ کی قائمہ کمیٹی برائے صحت نے ایم ڈی کیٹ 2026 کی تحقیقاتی رپورٹ پر عدم اطمینان ظاہر کیا ہے۔ وزارتِ صحت کو شکایات کی دوبارہ انکوائری کرکے ایک ہفتے میں رپورٹ دینے کی ہدایت کی گئی ہے۔
خبر رساں ادارے اے پی پی کے مطابق پی ایم ڈی سی حکام نے امتحان میں بے ضابطگی نہ ملنے کا بتایا۔ ارکان نے سوال اٹھایا کہ اہم شکایات کی تحقیقات ایک دن میں کیسے مکمل ہوگئیں۔ انہوں نے نصاب سے باہر سوالات کی شکایات اور امتحان کی شفافیت پر بھی تحفظات ظاہر کیے۔
ارکان نے اعتراض کیا کہ امتحان کے بعد امیدواروں سے سوالیہ کتابچے واپس لے لیے جاتے ہیں۔ انہیں سوالات کی نقل اپنے پاس رکھنے کی اجازت نہیں ہوتی۔ کمیٹی نے تین دن میں متعلقہ امتحان کا سوالیہ پرچہ عوام کے لیے جاری کرنے کی ہدایت کی۔
حکام کے مطابق کتابچے واپس لینے کا مقصد سوالات کے ذخیرے کو محفوظ رکھنا ہے۔ ان کا مؤقف تھا کہ سوالات ظاہر ہونے سے آئندہ برسوں کے امیدواروں کو غیر منصفانہ فائدہ مل سکتا ہے۔ کمیٹی نے یہ جواز مسترد کردیا۔
چیئرمین عامر ولی الدین چشتی نے خبردار کیا کہ تسلی بخش کارروائی نہ ہونے پر معاملہ ایف آئی اے کو بھیجا جاسکتا ہے۔
