چینی ڈاکٹروں نے ماں کے پیٹ میں بچے کے پھیپھڑوں کی سنگین پیدائشی خرابی کا مائیکروویو طریقے سے علاج کیا ہے۔ جنین میں اس خرابی کے لیے مائیکروویو ابلیشن کا یہ دنیا کا پہلا رپورٹ شدہ کیس ہے۔
برطانوی اخبار دی انڈیپنڈنٹ کے مطابق بچے کو کانجینیٹل پلمونری ایئروے مالفارمیشن (CPAM) نامی خرابی تھی۔ اس میں پھیپھڑوں کے اندر غیر معمولی ٹشو بن جاتا ہے۔ شدید صورتوں میں یہ بڑھ کر دل اور پھیپھڑوں پر دباؤ ڈال سکتا ہے۔ اس بچے کے پیٹ میں مائع بھی جمع ہوگیا تھا۔
ڈاکٹروں نے 22 ہفتے کے جنین میں ماں کے پیٹ سے باریک سوئی متاثرہ حصے تک پہنچائی۔ مائیکروویو انرجی سے حرارت پیدا کرکے غیر معمولی ٹشو کو اندر سے تباہ کیا گیا۔ تین دن میں اس کا حجم نمایاں طور پر کم ہوگیا اور پیٹ میں جمع مائع بھی ختم ہوگیا۔
37 ہفتے مکمل ہونے پر بچہ سیزیرین کے ذریعے پیدا ہوا اور اس کا وزن 2.9 کلوگرام تھا۔ یہ کیس طبی جریدے Ultrasound in Obstetrics & Gynecology میں شائع ہوا ہے۔ ماہرین کے مطابق پروسیجر کے محفوظ اور مؤثر ہونے کی جانچ کے لیے مزید تحقیق ضروری ہے۔
