ماہرین کے مطابق طبی عملے کے ہاتھوں کی صفائی مریضوں کو انفیکشن سے بچانے میں اہم کردار ادا کرتی ہے۔ انہوں نے یہ بات ہاتھ دھونے کے عالمی دن کی مناسبت سے اسلام آباد میں منعقدہ ایک آگاہی سیشن میں کہی۔ دنیا بھر میں یہ دن ہر سال 15 اکتوبر کو منایا جاتا ہے۔
اے پی پی کے مطابق سیشن کا اہتمام واٹر ایڈ پاکستان اور ہیلتھ سروسز اکیڈمی نے مشترکہ طور پر کیا۔ اس میں طبی ماہرین اور طلبہ کی بڑی تعداد نے شرکت کی۔ سیشن میں ہاتھ دھونے کا عملی مظاہرہ، مباحثے اور پوسٹر مقابلہ منعقد ہوا۔ شرکا کو صفائی کے بہتر طریقوں اور طبی مراکز میں ان کے باقاعدہ استعمال سے آگاہ کیا گیا۔
اکیڈمی کے وائس چانسلر پروفیسر ڈاکٹر شہزاد علی خان اور واٹر ایڈ پاکستان کے کنٹری ڈائریکٹر میاں محمد جنید نے شرکا سے خطاب کیا۔ انہوں نے طبی مراکز اور روزمرہ زندگی میں ہاتھ دھونے کی عادت اپنانے کی اہمیت اجاگر کی۔
