پنجاب میں انڈسٹریل ورکرز کو علاج کی سہولت فراہم کرنے کے لیے سوشل سکیورٹی موبائل ہیلتھ پروگرام شروع کردیا گیا ہے۔ ابتدائی مرحلے میں لاہور، قصور اور شیخوپورہ کے 46 لاکھ سے زائد افراد اس سے مستفید ہوں گے۔ وزیراعلیٰ پنجاب مریم نواز نے پروگرام کا افتتاح کیا۔
اے پی پی کے مطابق 65 موبائل یونٹس فیکٹریوں اور رہائشی علاقوں میں طبی خدمات فراہم کریں گے۔ ان میں موبائل ہسپتال، کلینکس اور دانتوں اور دل کے امراض کی تشخیص کے خصوصی یونٹس شامل ہیں۔ مریضوں کو طبی معائنہ، ضروری ٹیسٹ، ادویات، ابتدائی طبی امداد اور ٹیلی میڈیسن کی سہولت میسر ہوگی۔
موبائل ہیلتھ پروگرام کے ذریعے تقریباً 30 ہزار صنعتی اداروں تک رسائی حاصل کی جائے گی۔ ورکرز ویلفیئر سکولوں کے 54 ہزار بچوں کی دل کی بیماریوں کے لیے سکریننگ بھی ہوگی۔ حکام کے مطابق مارچ 2027 تک پروگرام کو راولپنڈی، فیصل آباد، ملتان اور دیگر شہروں تک توسیع دینے کا ہدف مقرر کیا گیا ہے۔
