پیکٹ والے سنیکس، میٹھے مشروبات اور انسٹنٹ نوڈلز کا زیادہ استعمال دماغی خون کی نالیوں کو متاثر کرسکتا ہے۔ نئی تحقیق میں ایسی غذاؤں کے زیادہ استعمال والوں میں دماغی نقصان کے آثار 40 فیصد زیادہ تھے۔
جرنل ’جاما نیٹ ورک اوپن‘ میں شائع تحقیق میں کینیڈا کے 8,783 افراد شامل تھے۔ ان کی عمریں 35 سے 69 سال کے درمیان تھیں۔ محققین نے خوراک، جسمانی چربی، دماغی ایم آر آئی اور ذہنی کارکردگی کا جائزہ لیا۔ نتائج کے مطابق زیادہ الٹرا پراسیس غذائیں کھانے والوں میں جسمانی چربی زیادہ تھی۔ پیٹ کے اندرونی حصے کی چربی بھی زیادہ پائی گئی۔ ان افراد میں دماغی خون کی نالیوں سے متعلق خاموش نقصان کے آثار 40 فیصد زیادہ تھے۔ تاہم ذہنی کارکردگی کے ٹیسٹ میں واضح فرق نہیں ملا۔
ماہرین کے مطابق نتائج خوراک اور دماغی تبدیلیوں کے درمیان تعلق ظاہر کرتے ہیں۔ تاہم یہ تحقیق الٹرا پراسیس غذاؤں کو دماغی نقصان کی براہِ راست وجہ ثابت نہیں کرتی۔
محققین نے طویل مدتی تحقیق کی ضرورت پر زور دیا۔ اس سے یہ جاننے میں مدد ملے گی کہ دماغ میں نظر آنے والی تبدیلیاں مستقبل میں صحت پر کیا اثر ڈالتی ہیں۔
