بلوچستان میں مفت طبی مشوروں کے لیے صحت دہلیز ایپ متعارف

بلوچستان حکومت نے گھر بیٹھے مفت طبی مشوروں کے لیے صحت دہلیز ایپ متعارف کرا دی ہے۔ شہری اس کے ذریعے تجربہ کار ڈاکٹروں سے 24 گھنٹے رہنمائی حاصل کر سکتے ہیں۔

اے پی پی کے مطابق وزیراعلیٰ سرفراز بگٹی نے ایکس پر اس سہولت کے آغاز کا اعلان کیا۔ انہوں نے بتایا کہ پہلے روز 791 کالز کے ذریعے مفت طبی مشورے فراہم کیے گئے۔ ان کے مطابقا یہ سہولت خاص طور پر دوردراز اور پسماندہ علاقوں کے رہائشیوں کے لیے شروع کی گئی ہے۔ سال کے 365 دن دستیاب اس سروس سے ابتدائی طبی رہنمائی کے لیے طویل سفر کی ضرورت کم ہوگی۔

وزیراعلیٰ نے کہا کہ بلوچستان کے وسیع رقبے اور الگ تھلگ آبادیوں کے باعث طبی مراکز تک پہنچنا مشکل ہے۔ صحت دہلیز ایپ ان علاقوں کے لوگوں کو گھر بیٹھے ڈاکٹروں سے رابطے کی سہولت دے گی۔