طبی ماہرین نے سابقہ علاج سے بچے ہوئے اینٹی بایوٹکس ڈاکٹری مشورے کے بغیر استعمال نہ کرنے کی ہدایت کی ہے۔ ان کے مطابق ان ادویات کے غیرضروری یا غلط استعمال سے بیکٹیریا میں مزاحمت بڑھ سکتی ہے۔ یوں عام انفیکشنز کا علاج بھی مشکل ہوسکتا ہے۔
اے پی پی کے مطابق، اسلام آباد کی میڈیکل سپیشلسٹ ڈاکٹر نائلہ شمیم نے کہا کہ اینٹی بایوٹکس مستند ڈاکٹر کے نسخے پر ہی لیں۔ تجویز کردہ خوراک اور علاج کی مدت پر عمل کریں۔ اس کے علاوہ ڈاکٹری مشورے کے بغیر دوا ازخود بند نہ کریں، نہ خوراک بدلیں۔
ڈاکٹر مقصود ملک نے بتایا کہ سانس کی کئی موسمی بیماریاں وائرس سے ہوتی ہیں۔ اینٹی بایوٹکس بیکٹیریا کے خلاف مؤثر ہیں، تاہم وائرل بیماریوں کا علاج نہیں کرتیں۔ ایسے انفیکشنز میں ڈاکٹر سے یہ ادویات تجویز کرنے کا مطالبہ نہ کریں۔
ماہرین نے اینٹی بایوٹکس کی غیرضروری فروخت روکنے کا مطالبہ کیا۔ انہوں نے ان کے درست استعمال سے متعلق آگاہی بڑھانے کی ضرورت پر بھی زور دیا۔
