امریکا میں ہونے والے ایک سروے سے معلوم ہوا ہے کہ ہر چار میں سے ایک نوجوان کا مستقل ڈاکٹر نہیں۔ ماہرین کے مطابق اس رجحان سے بیماریوں کی بروقت تشخیص اور بچاؤ متاثر ہو سکتا ہے۔
اوہائیو اسٹیٹ یونیورسٹی ویکسنر میڈیکل سینٹر کے سروے کے مطابق صرف 47 فیصد نوجوانوں نے گزشتہ سال سالانہ طبی معائنہ کرایا۔ بہت سے نوجوان باقاعدہ معائنے کے بجائے ضرورت پڑنے پر ہنگامی طبی مراکز سے رجوع کرتے ہیں۔
ماہرین کے مطابق مستقل ڈاکٹر مریض کی طبی تاریخ سے واقف ہوتا ہے۔ اس سے جسمانی اور ذہنی مسائل کی بروقت تشخیص اور مناسب رہنمائی ممکن ہوتی ہے۔ اس کے برعکس ہنگامی طبی مراکز فوری علاج تو فراہم کرتے ہیں، مگر طویل مدتی نگہداشت کا متبادل نہیں۔ ماہرین کا کہنا ہے کہ باقاعدہ طبی معائنہ نہ کرانے سے بعض بیماریوں کی تشخیص میں تاخیر ہو سکتی ہے۔
ماہرین کے مطابق علاج کے بڑھتے اخراجات، انشورنس کے مسائل اور مستقل ڈاکٹر تک محدود رسائی بھی اس رجحان کی اہم وجوہات ہیں۔ انہوں نے نوجوانوں کو مشورہ دیا کہ وہ اپنی صحت کے لیے کسی قابلِ اعتماد مستقل ڈاکٹر سے رابطہ رکھیں۔
