ایک حالیہ تحقیق میں رائی کے پولن سے وابستہ تقریباً 30 سال پرانا سائنسی معمہ حل کر لیا گیا ہے۔ اس سے اس کے ممکنہ طور پر کینسر مخالف اثرات پر مزید تحقیق کی نئی راہیں کھل گئی ہیں۔
امریکا کی نارتھ ویسٹرن یونیورسٹی کے ماہرین کی یہ تحقیق طبی جریدے جرنل آف دی امریکن کیمیکل سوسائٹی میں شائع ہوئی ہے۔ تقریباً 30 سال پہلے رائی کے پولن کے دو قدرتی مالیکیولز سیکالوسائیڈ اے اور سیکالوسائیڈ بی دریافت ہوئے۔ ان مالیکیولز کو رسولیوں کی افزائش سست ہونے سے منسلک پایا گیا۔ تاہم ان کی درست ساخت معلوم نہ ہونے سے تحقیق تعطل کا شکار ہو گئی تھی۔ محققین نے اب لیبارٹری میں ان مالیکیولز کی درست 3D سٹرکچر کی تصدیق کر دی ہے۔
ان کے مطابق اس پیش رفت سے یہ جانچنا ممکن ہوگا کہ یہ مالیکیولز مدافعتی نظام کے ساتھ کس طرح تعامل کرتے ہیں. اس کے علاوہ ان میں کون سا حصہ ممکنہ طور پر کینسر ختم کرنے والے اثرات کا حامل ہے۔
