روزانہ اخروٹ کھانے والوں میں غذا کی وجہ سے سوزش کا امکان کم، تحقیق

روزانہ اخروٹ کھانے والے معمر افراد کا غذائی سوزش انڈیکس دوسرے گروپ کے مقابلے میں کم پایا گیا۔ یہ انڈیکس بتاتا ہے کہ مجموعی غذا میں سوزش بڑھانے یا کم کرنے والی خصوصیات کتنی ہیں۔

امریکا کی لوما لنڈا یونیورسٹی کے مطابق تحقیق میں 319 افراد شامل تھے۔ ان کی اوسط عمر تقریباً 69 سال تھی۔ ان میں سے 166 افراد کو روزانہ 30 سے 60 گرام اخروٹ کھانے کو کہا گیا۔ باقی 153 افراد نے اخروٹ سے گریز کیا اور دیگر خشک میوہ جات کا استعمال محدود رکھا۔

دو سال بعد روزانہ اخروٹ کھانے والوں کا غذائی سوزش انڈیکس نمایاں طور پر کم تھا۔ تاہم، اس تجزیے میں جسمانی سوزش کی براہِ راست پیمائش کے بجائے خوراک کی معلومات استعمال کی گئیں۔ یہ تحقیق طبی جریدے ’جرنل آف دی اکیڈمی آف نیوٹریشن اینڈ ڈائیٹیٹکس‘ میں شائع ہوئی۔