دل کی بیماریوں کے خطرات کم کرنے کے لیے صحت بخش خوراک، باقاعدہ ورزش اور تمباکو نوشی سے پرہیز ضروری ہے۔ اسی پیغام کے ساتھ آج پاکستان سمیت دنیا بھر میں دل کا عالمی دن منایا جا رہا ہے۔ یہ دن ہر سال 29 ستمبر کو منایا جاتا ہے۔ اس کا مقصد دل کی صحت سے متعلق آگہی بڑھانا اور قابلِ تدارک خطرات کم کرنا ہے۔
ڈبلیو ایچ او کے مطابق امراض قلب دنیا بھر میں اموات کی سب سے بڑی وجہ ہیں۔ 2022 میں تقریباً ایک کروڑ 98 لاکھ افراد ان بیماریوں کے باعث جان سے گئے۔ تقریباً 85 فیصد اموات ہارٹ اٹیک اور فالج سے ہوئیں۔
ہائی بلڈ پریشر، ذیابیطس، کولیسٹرول اور موٹاپا دل کی بیماریوں کے اہم خطرات ہیں۔ تمباکو نوشی، غیر صحت مند خوراک اور جسمانی سرگرمی کی کمی بھی خطرہ بڑھاتی ہے۔ ماہرین صحت بخش خوراک، باقاعدہ ورزش اور وزن قابو میں رکھنے پر زور دیتے ہیں۔ ان کے مطابق بلڈ پریشر، بلڈ شوگر اور کولیسٹرول کی باقاعدہ جانچ بھی ضروری ہے۔
