پیری مینوپاز

پیری مینوپاز، مینوپاز سے پہلے کا مرحلہ ہے جس میں جسم ماہواری کا عمل روکنے کی تیاری کر رہا ہوتا ہے۔ یہ عموماً 40 سال کی عمر کے بعد شروع ہوتا ہے، تاہم بعض خواتین میں 30 یا 50 سال کی عمر کے بعد بھی علامات ظاہر ہو سکتی ہیں۔ مسلسل 12 ماہ تک ماہواری نہ آئے تو پیری مینوپاز ختم ہو جاتا ہے اور مینوپاز کا آغاز ہو جاتا ہے۔

علامات

پیری مینوپاز کے دوران یہ علامات ظاہر ہو سکتی ہیں:

٭ ماہواری میں بے قاعدگی

٭ اچانک شدید گرمی لگنا اور پسینہ آنا

٭ نیند کی خرابی

٭ مزاج میں تبدیلی

٭ اندام نہانی میں خشکی

٭ جنسی تعلق کے دوران درد

٭ پیشاب کرتے وقت جلن ہونا

٭ بار بار پیشاب آنا یا بے اختیار خارج ہونا

٭ ہڈیوں کی کمزوری یا بھربھراپن

٭برے کولیسٹرول میں اضافہ

وجوہات

پیری مینوپاز کی بنیادی وجہ ایسٹروجن اور پروجیسٹرون ہارمونز کی کمی یا زیادتی ہے۔ زیادہ ترعلامات ایسٹروجن کی کمی کی وجہ سے ظاہر ہوتی ہیں۔

خطرے کے عوامل

مینوپاز کا عمل قدرتی ہوتا ہے تاہم کچھ خواتین میں یہ وقت سے پہلے شروع ہو سکتا ہے۔ یہ عوامل اس کے امکانات بڑھاتے ہیں:

٭ تمباکو نوشی

٭ فیملی ہسٹری

٭ کینسر کا علاج

٭ ہسٹریکٹومی (یوٹرس نکالنے کی سرجری)

٭ تھائی رائیڈ کی بیماری، ریمیٹائیڈ آرتھرائٹس اور دیگر مدافعتی بیماریاں

پیچیدگیاں

پیری مینوپاز کے دوران ماہواری میں بے قاعدگی عام ہے۔ اگر یہ علامات ہوں تو ڈاکٹر کو دکھائیں:

٭ معمول سے بہت زیادہ خون آئے

٭ ماہواری سات دن سے زیادہ جاری رہے

٭ ماہواری کے درمیان وقفہ 21 دن سے کم ہو جائے

٭ مسلسل 12 ماہ ماہواری بند رہنے کے بعد دوبارہ خون آنے لگے

تشخیص

پیری مینوپاز کی تشخیص کے لیے کوئی ایک مخصوص ٹیسٹ موجود نہیں۔ ڈاکٹر عموماً عمر، ماہواری کی ہسٹری اور علامات کا جائزہ لیتے ہیں۔ ضرورت پڑنے پر ہارمون کے ٹیسٹ کیے جا سکتے ہیں۔

علاج

اگرعلامات روزمرہ زندگی کو متاثر کر رہی ہوں تو ادویات تجویز کی جا سکتی ہیں۔ ان میں ہارمون تھیراپی، اینٹی ڈپریسنٹس اور دیگر کچھ ادویات شامل ہیں جو مختلف علامات کو کم کرتی ہیں۔

علاج کا انتخاب علامات، مجموعی صحت اور ماہواری کی ہسٹری کو مدنظر رکھ کر کیا جاتا ہے، اس لیے دوا کا استعمال ڈاکٹر کے مشورے سے کریں۔