ماہرین کے مطابق پالک، بادام اور شکر قندی سمیت بعض غذاؤں میں قدرتی طور پر موجود آکسیلیٹ آنتوں کی سوزش بڑھانے میں کردار ادا کرسکتا ہے۔ یہ بات ایک نئی تحقیق میں سامنے آئی ہے۔
یونیورسٹی آف نارتھ کیرولائنا ایٹ چیپل ہِل کے سائنس دانوں کی تحقیق میں انفلیمیٹری باول ڈیزیز (آئی بی ڈی) کے مریضوں اور صحت مند افراد کا جائزہ لیا گیا۔ تحقیق جرنل سیلولر اینڈ مالیکیولر گیسٹرواینٹرولوجی اینڈ ہیپاٹولوجی میں شائع ہوئی۔
محققین نے شرکاء کے آنتوں کے ٹشوز، فضلے اور غذائی عادات کا جائزہ لیا۔ نتائج میں آئی بی ڈی کے مریضوں کی آنتوں میں آکسیلیٹ خارج کرنے کی صلاحیت کم پائی گئی۔
کروہن ڈیزیز کے مریضوں کے فضلے میں بھی آکسیلیٹ کی مقدار زیادہ تھی۔ چوہوں پر تجربات میں آکسیلیٹ والی غذا سے بعض چوہوں میں سوزش زیادہ شدید ہوئی۔
انسانی خلیوں پر لیبارٹری تجربات میں بھی آکسیلیٹ اور سوزش کے درمیان ممکنہ تعلق سامنے آیا۔ تاہم محققین نے آئی بی ڈی کے مریضوں کو ایسی غذائیں چھوڑنے کا مشورہ نہیں دیا۔
محققین کے مطابق ایسا مشورہ ابھی قبل از وقت ہوگا۔ اس تعلق کو سمجھنے کے لیے انسانوں پر مزید تحقیق ضروری ہے۔
