گھٹنے کے شدید درد میں بغیر بڑی سرجری کے کمی لانے والے ایک نئے طریقہ علاج کے ملے جلے نتائج سامنے آئے ہیں۔ ابتدائی تحقیقات میں بعض مریضوں کو نمایاں فائدہ ہوا، تاہم تازہ تحقیق میں اس کا مؤثر ہونا واضح طور پر ثابت نہیں ہو سکا۔
یونیورسٹی آف کولوراڈو کے مطابق اس طریقے کو جینیکیولر آرٹری ایمبولائزیشن کہا جاتا ہے۔ اس میں گھٹنے کی باریک خون کی نالیوں میں خون کی روانی کم کرکے درد اور سوزش کم کرنے کی کوشش کی جاتی ہے۔
پہلے سامنے آنے والے نتائج میں تقریباً 70 فیصد مریضوں کے درد میں نصف یا زیادہ کمی دیکھی گئی۔ بعض مریضوں کو دو سے چار سال تک فائدہ ہوا۔ یہ طریقہ ایک سے دو گھنٹے میں مکمل ہوتا ہے۔ مریض اکثر اسی دن گھر جا سکتا ہے۔
تاہم حالیہ تحقیق میں 12 ماہ بعد دونوں گروپس کے درد میں واضح فرق نہیں ملا۔ ماہرین کے مطابق اس طریقے پر مزید تحقیق ضروری ہے۔ فی الحال اسے گھٹنے کی تبدیلی کی سرجری کا ثابت شدہ متبادل نہیں سمجھا جاسکتا۔
