انٹرنیٹ کے زیادہ استعمال سے ذہنی دباؤ اور بے چینی میں اضافہ، تحقیق

ایک نئی تحقیق میں ضرورت سے زیادہ انٹرنیٹ استعمال اور ذہنی دباؤ کے درمیان ممکنہ تعلق سامنے آیا ہے۔ یہ تحقیق طبی جریدے پلوس ون میں شائع ہوئی۔ اس میں جرمنی کے 900 بالغ افراد کا جائزہ لیا گیا۔

محققین کے مطابق کچھ لوگ پریشانی یا خراب موڈ سے بچنے کے لیے زیادہ انٹرنیٹ استعمال کرتے ہیں۔ تاہم تحقیق میں ایسے افراد زیادہ ذہنی دباؤ، خراب موڈ اور روزمرہ ذمہ داریوں سے غفلت کا شکار پائے گئے۔ تحقیق میں بتایا گیا کہ سوشل میڈیا پر دوسروں سے مسلسل موازنہ کرنا بھی ذہنی دباؤ میں اضافہ کر سکتا ہے۔ 

ماہرین کے مطابق زیادہ سکرین استعمال جسمانی سرگرمی کم کر دیتا ہے۔ اس سے ذہنی تھکن بھی بڑھ سکتی ہے۔

ماہرین نے مشورہ دیا کہ انٹرنیٹ استعمال کی وجہ پہچانیں۔ دباؤ محسوس ہونے پر فوری سکرین استعمال کرنے سے گریز کریں۔ انہوں نے کہا کہ ورزش، موسیقی، اہل خانہ کے ساتھ وقت گزارنا اور کچھ دیر سکرین سے دور رہنا بہتر متبادل ہو سکتے ہیں۔ محققین نے واضح کیا کہ یہ تحقیق بالغ افراد تک محدود تھی۔ بچوں پر اس کے اثرات جاننے کے لیے مزید تحقیق درکار ہے۔