امریکا میں جلد کی طویل مدتی بیماری سمپٹومیٹک ڈرموگرافزم کے علاج کے لیے ریپسیڈو (Rhapsido) نامی دوا کی منظوری دے دی گئی ہے۔ یہ چھپاکی (ارٹیکیریا) کی ایک قسم ہے، جس میں جلد رگڑنے یا کھجانے سے خارش اور ابھری ہوئی لکیریں بن جاتی ہیں۔
خبر رساں ادارے رائٹرز کے مطابق یہ فیصلہ امریکی فوڈ اینڈ ڈرگ ایڈمنسٹریشن (ایف ڈی اے) نے کیا ہے۔ نووارٹس کی یہ دوا ان بالغ مریضوں کے لیے ہے جنہیں عام اینٹی ہسٹامین ادویات سے مناسب فائدہ نہیں ہوتا۔
کلینیکل ٹرائل میں 12 ہفتوں بعد دوا لینے والے 29.3 فیصد مریضوں کے دانے مکمل ختم ہوگئے۔ اس کے مقابلے میں فرضی دوا لینے والے 14 فیصد مریضوں میں یہی نتیجہ دیکھا گیا۔ بعض مریضوں میں دو ہفتوں کے اندر بہتری شروع ہوگئی۔
ممکنہ مضر اثرات میں سردرد، متلی، ناک بند ہونا، گلے میں درد اور خون بہنا شامل ہیں۔ ریپسیڈو پہلے ہی چھپاکی کی ایک دوسری قسم کے لیے منظورشدہ ہے۔
