کریٹین صرف پٹھوں ہی نہیں، ڈپریشن میں بھی مددگار، تحقیق

ایک نئی تحقیق کے مطابق جم میں عام استعمال ہونے والا سپلیمنٹ کریٹین ڈپریشن کے روایتی علاج کے ساتھ بطور اضافی معاون علاج فائدہ مند ہو سکتا ہے۔ کینیڈا کے محققین کی یہ تحقیق طبی جریدے برین میڈیسن میں شائع ہوئی ہے۔

محققین نے پانچ طبی سٹڈیز کا جائزہ لیا۔ ان میں سے چار شدید ڈپریشن اور ایک بائی پولر ڈس آرڈر کے مریضوں پر کی گئی تھی۔ بعض سٹڈیز میں کریٹین کو اینٹی ڈپریسنٹ ادویات یا کگنیٹو بیہیویئرل تھراپی کے ساتھ استعمال کیا گیا۔ اس سے ڈپریشن کی علامات میں زیادہ بہتری دیکھی گئی۔ تاہم، دیگر سٹڈیز میں نمایاں فائدہ سامنے نہیں آیا۔

تحقیق کے مرکزی مصنف بسام جیریوس فارس نے کہا کہ یہ نتائج حوصلہ افزا ضرور ہیں، لیکن موجودہ علاج میں تبدیلی کی سفارش کے لیے ابھی کافی مضبوط شواہد موجود نہیں۔ ان کے مطابق اس حوالے سے مزید بڑے اور معیاری سٹڈیز کی ضرورت ہے۔

ماہرین نے واضح کیا کہ کریٹین کو ڈپریشن کے روایتی علاج کا متبادل نہیں سمجھنا چاہیے۔ اسے صرف ایک ممکنہ معاون علاج کے طور پر مزید تحقیق کی روشنی میں دیکھا جانا چاہیے۔