خصیے کا درد

خصیے کا درد (Testicle pain) وہ درد ہے جو ایک یا دونوں خصیوں میں یا ان کے گرد محسوس ہوتا ہے۔ درد کبھی کبھار پیٹ یا کمر کے کسی اور حصے سے شروع ہو کر خصیوں میں محسوس ہوتا ہے۔ اسے منتقل شدہ درد کہا جاتا ہے۔

وجوہات

خصیے بہت حساس ہوتے ہیں لہٰذا معمولی چوٹ بھی درد پیدا کر سکتی ہے۔ درد خصیے کے اندر سے بھی شروع ہو سکتا ہے یا اس کے پیچھے موجود لچکیلی نالی اور سہارا دینے والے ٹشو سے بھی پیدا ہو سکتا ہے۔

خصیوں میں محسوس ہونے والا درد بعض اوقات کمر، پیٹ یا کسی اور جگہ کے مسئلے کی وجہ سے بھی ہوتا ہے۔ مثال کے طور پر، گردے کی پتھری یا بعض ہرنیا خصیوں کے درد کا سبب بن سکتے ہیں۔ بعض اوقات درد کی اصل وجہ معلوم نہیں بھی ہو پاتی۔

خصیوں کے اندر یا سکروٹم میں شروع ہونے والی وجوہات یہ ہیں:

٭ خصیے کے پیچھے والی نالی میں سوجن

٭ سکروٹم میں مائع جمع ہونے کی وجہ سے سوجن

٭ ایک یا دونوں خصیوں میں سوجن

٭ سکروٹم میں گانٹھیں، جو کینسر یا دیگر غیر سرطانی حالات کی وجہ سے ہو سکتی ہیں

٭ خصیے کے اوپر یا قریب مائع سے بھری چھوٹی سی تھیلی

٭ خصیوں کی چوٹ

٭ خصیہ مڑ جانے سے اس میں خون کی فراہمی بند ہو جانا

٭ سکروٹم میں بڑھی ہوئی رگیں

سکروٹم کے باہر سے شروع ہونے والی وجوہات مندرجہ ذیل ہیں:

٭ ذیابیطس سے ہونے والا اعصابی نقصان

٭ خون کی چھوٹی نالیوں میں سوجن اور خون بہنا

٭ انگوائنل ہرنیا، پیٹ کی کمزور جگہ سے ٹشو نکلنا اور سکروٹم میں جانا

٭ گردے کی پتھری

٭ ممپس

٭ پروسٹیٹ میں انفیکشن یا سوجن

٭ پیشاب کی نالی کا انفیکشن

ڈاکٹر سے کب رجوع کریں

خصیے کا اچانک اور شدید درد ٹیسٹیکولر ٹورشن کی علامت ہو سکتا ہے۔ اس حالت میں خصیہ خون کی فراہمی کھو سکتا ہے۔ اس میں فوری علاج ضروری ہوتا ہے۔ یہ کسی بھی عمر میں ہو سکتا ہے، مگر زیادہ تر نوعمروں میں پایا جاتا ہے۔

فوری طبی مدد حاصل کریں اگر:

٭ خصیے کا درد اچانک اور شدید ہو

٭ درد کے ساتھ متلی، بخار، کپکپی یا پیشاب میں خون ہو

ڈاکٹر سے معمول کی ملاقات کریں اگر:

٭ ہلکا خصیے کا درد کئی دنوں تک برقرار رہے

٭ خصیے میں یا اس کے گرد گانٹھ یا سوجن ہو

سیلف کیئر

یہ اقدامات ہلکے خصیے کے درد کو کم کرنے میں مدد دے سکتے ہیں:

٭ درد کم کرنے والی دوا لیں جب تک کہ ڈاکٹر نے کوئی اور ہدایت نہ دی ہو

٭ بچوں اور نوعمروں کو اسپرین دیتے وقت احتیاط کریں۔ یہ صرف تین سال سے بڑے بچوں کو دی جا سکتی ہے۔ چکن پاکس یا فلو کی علامات والے بچوں کو کبھی نہیں دی جاتی کیونکہ یہ ریے سنڈروم (Reye’s syndrome) پیدا کر سکتی ہے

٭ سکروٹم کی سپورٹ کے لیے ایتھلیٹک سپورٹر استعمال کریں۔ لیٹے ہوئے وقت تولیے سے سکروٹم کو سپورٹ دیں اور اونچا کریں۔ آئس پیک یا تولیے میں لپٹی برف بھی لگائی جا سکتی ہے

نوٹ: یہ مضمون صرف قارئین کی معلومات کے لیے شائع کیا گیا ہے۔ صحت سے متعلق امور میں ہمیشہ اپنے معالج کے مشورے پر عمل کریں۔