روبوٹک سرجری

روبوٹک سرجری (Robotic surgery) پیچیدہ میڈیکل پروسیجرز کو زیادہ درستگی، اور بہتر کنٹرول کے ساتھ انجام دینے میں مدد دیتی ہے۔ یہ طریقہ روایتی سرجری کے مقابلے میں زیادہ جدید سمجھا جاتا ہے۔ اس میں اکثر چھوٹے چیروں کے ذریعے آپریشن کیا جاتا ہے، تاہم بعض صورتوں میں اسے اوپن سرجری میں بھی استعمال کیا جاتا ہے۔ اسے روبوٹ کی مدد سے کی جانے والی سرجری (Robot assisted surgery) بھی کہا جاتا ہے۔

اس نظام میں عموماً سرجیکل آلات کے حامل کیمرہ آرم اور متعدد مکینیکل آرمز شامل ہوتے ہیں۔ سرجن ان بازوؤں کو ایک کنسول سے کنٹرول کرتا ہے۔ کنسول روبوٹک سرجری کے نظام میں وہ کنٹرول اسٹیشن ہوتا ہے جہاں سرجن بیٹھ کر پورے آپریشن کو کنٹرول کرتا ہے۔ سرجن کو آپریشن کے مقام کی بڑی، واضح اور تھری ڈی تصویر دکھائی جاتی ہے۔ پورے عمل کے دوران سرجن معاون طبی عملے کی بھی راہنمائی کرتا ہے۔

کیوں کی جاتی ہے

روبوٹک سرجری سرجن کو آپریشن کے دوران زیادہ درستگی، بہتر کنٹرول اور سہولت فراہم کرتی ہے۔ اس ٹیکنالوجی کی مدد سے آپریشن کے مقام کو زیادہ واضح طور پر دیکھا جا سکتا ہے، جس سے روایتی طریقوں کے مقابلے میں بہتر نتائج حاصل ہوتے ہیں۔ اس کے ذریعے ایسے نازک اور پیچیدہ آپریشن بھی ممکن ہو جاتے ہیں جو عام سرجری سے کرنا مشکل یا بعض اوقات ناممکن ہوتے ہیں۔

یہ طریقہ عموماً کم تکلیف دہ سرجری کے طور پر چھوٹے چیروں کے ذریعے کیا جاتا ہے۔ اس کے اہم فوائد درج ذیل ہیں:

٭ آپریشن کے بعد پیچیدگیوں، خصوصاً انفیکشن کا خطرہ کم ہوتا ہے

٭ درد اور خون کا ضیاع کم ہوتا ہے

٭ ہسپتال میں قیام کی مدت کم اور صحت یابی جلد ہوتی ہے

٭ نشانات چھوٹے اور کم ہوتے ہیں

خطرات

روبوٹک سرجری میں بھی کچھ خطرات موجود ہوتے ہیں جو روایتی اوپن سرجری جیسے ہو سکتے ہیں، جیسے انفیکشن کا معمولی خطرہ اور دیگر طبی پیچیدگیاں۔

کیا روبوٹک سرجری آپ کے لیے موزوں ہے؟

روبوٹک سرجری ہر مریض کے لیے موزوں نہیں ہوتی۔ اس کے فوائد اور خطرات کے بارے میں اپنے ڈاکٹر سے تفصیل سے مشورہ کریں۔ یہ بھی جانیں کہ یہ طریقہ دیگر تکنیکوں، جیسے کم تکلیف دہ سرجری یا روایتی اوپن سرجری کے مقابلے میں کتنا مؤثر ہے۔ یہ سہولت ہر طبی مرکز میں دستیاب نہیں ہوتی۔

نوٹ: یہ مضمون صرف قارئین کی معلومات کے لیے شائع کیا گیا ہے۔ صحت سے متعلق امور میں ہمیشہ اپنے معالج کے مشورے پر عمل کریں۔

٭ ڈاکٹر سے رابطے کے لئے لنک پر کلک کریں:

https://www.shifa.com.pk/find-a-doctor?speciality=general-surgeon