پیلی ایٹو کیئر ایک خصوصی طبی نگہداشت ہے جو سنگین بیماریوں میں درد اور دیگر علامات میں آرام فراہم کرتی ہے۔ یہ علاج کے مضر اثرات کم کرنے اور مریض کی مجموعی کیفیت بہتر بنانے میں مدد دیتی ہے۔ اس کا تعلق بیماری کے قابلِ علاج ہونے یا نہ ہونے سے نہیں ہوتا۔
پیلی ایٹو کیئر کا مقصد مریض اور اس کے خاندان کے لیے آرام، سہولت اور معیارِ زندگی میں بہتری فراہم کرنا ہے۔ یہ نگہداشت جاری علاج کے ساتھ دی جاتی ہے اور اضافی معاونت فراہم کرتی ہے۔
یہ کیوں کیا جاتا ہے
پیلی ایٹو کیئر کسی بھی عمر کے ایسے افراد کو دی جا سکتی ہے جنہیں سنگین یا جان لیوا بیماری لاحق ہو۔ اس میں درج ذیل بیماریاں شامل ہو سکتی ہیں:
٭ کینسر
٭ خون اور بون میرو کی بیماریاں جن میں سٹیم سیل ٹرانسپلانٹ کی ضرورت ہو
٭ دل کی بیماریاں
٭ سسٹک فائبروسس
٭ ڈیمینشیا
٭ جگر کی آخری اسٹیج کی بیماری
٭ گردوں کی ناکامی
٭ پھیپھڑوں کی بیماریاں
٭ پارکنسن کی بیماری
٭ سٹروک اور دیگر شدید بیماریاں
پیلی ایٹو کیئر ان علامات میں بھی بہتری لا سکتی ہے جو روزمرہ زندگی کو متاثر کرتی ہیں، جیسے:
٭ درد
٭ متلی یا قے
٭ بے چینی یا اضطراب
٭ ڈپریشن یا اداسی
٭ قبض
٭ سانس لینے میں دشواری
٭ بھوک میں کمی
٭ تھکن
٭ نیند کی خرابی
تیاری کیسے کریں
پہلی مشاورت سے قبل درج ذیل تیاریاں مفید ہوتی ہیں:
٭ اپنی علامات کی فہرست تیار کریں اور لکھیں کہ کون سی چیز انہیں بہتر یا خراب کرتی ہے
٭ تمام ادویات اور سپلیمنٹس کی فہرست ساتھ لائیں، خوراک اور استعمال کے وقت سمیت
٭ ممکن ہو تو کسی قریبی فرد یا دوست کو ساتھ لے جائیں
٭ اپنی لِونگ ول (Living will) اور طبی فیصلوں کا بااختیار نمائندہ مقرر کرنے والی دستاویزات ساتھ رکھیں۔ لِونگ ول ایک قانونی دستاویز ہوتی ہے جس میں آپ پہلے سے طے کرتے ہیں کہ شدید بیماری کی صورت میں کون سا علاج چاہتے ہیں یا نہیں چاہتے
آپ کیا توقع کر سکتے ہیں
پیلی ایٹو کیئر بیماری کے کسی بھی مرحلے پر علاج کا حصہ بن سکتی ہے۔ مریض عموماً اس وقت اس پر غور کرتے ہیں جب انہیں علاج، سہولت اور مستقبل کے فیصلوں سے متعلق سوالات ہوں۔
ابتدائی پیلی ایٹو کیئر کے فوائد:
٭ معیارِ زندگی میں بہتری
٭ ذہنی دباؤ اور اضطراب میں کمی
٭ مریض اور خاندان کے اطمینان میں اضافہ
٭ بعض صورتوں میں زندگی کی مدت میں اضافہ
ابتدائی ملاقات ہسپتال یا کلینک میں ہوتی ہے، جہاں مریض کی حالت اور ضروریات کا تفصیلی جائزہ لیا جاتا ہے۔
مشاورت کے دوران
پیلی ایٹو کیئر ٹیم مریض کی علامات، موجودہ علاج اور بیماری کے اثرات پر گفتگو کرتی ہے۔ اس کے ساتھ مریض اور خاندان کی ضروریات کو سمجھ کر نگہداشت کا ایک جامع منصوبہ تیار کیا جاتا ہے۔ یہ منصوبہ دیگر ڈاکٹروں کے علاج کے ساتھ مکمل طور پر ہم آہنگ ہوتا ہے۔
مشاورت کے بعد
پیلی ایٹو کیئر پلان مریض کی ضروریات کے مطابق ترتیب دیا جاتا ہے اور اس میں شامل ہو سکتا ہے:
٭ علامات کا مؤثر انتظام تاکہ آرام اور سکون میں اضافہ ہو
٭ مریض اور خاندان کے لیے جذباتی، سماجی اور روحانی معاونت
٭ آرام دینے والے طریقے جیسے سانس کی ورزشیں، میڈیٹیشن، تصوراتی مشقیں اور موسیقی تھیراپی
٭ مختلف ماہرین، مثلاً سائیکالوجسٹ، پین سپیشلسٹ یا انٹیگریٹو میڈیسن سپیشلسٹ کی طرف ریفرل
نوٹ: یہ مضمون صرف قارئین کی معلومات کے لیے شائع کیا گیا ہے۔ صحت سے متعلق امور میں ہمیشہ اپنے معالج کے مشورے پر عمل کریں۔
٭ ڈاکٹر سے رابطے کے لئے لنک پر کلک کریں:
https://www.shifa.com.pk/find-a-doctor?speciality=palliative-care
