ماہرین صحت نے پاکستانی خواتین کی ادھیڑعمری اور اس کے بعد بہتر صحت کے لیے قومی حکمتِ عملی بنانے پر زور دیا ہے۔ ان کے مطابق مینوپاز کے دوران ایسٹروجن ہارمون کی سطح کم ہوتی ہے۔ اس سے دل کی بیماری، ذیابیطس، ہائی بلڈ پریشر، موٹاپے اور ہڈیوں کی کمزوری کا خطرہ بڑھ سکتا ہے۔
دی نیوز کے مطابق پاکستان مینوپاز سوسائٹی کی سالانہ کانفرنس میں 120 سے زائد ملکی و غیر ملکی ماہرین نے شرکت کی۔ کانفرنس میں مینوپاز، دل، میٹابولزم، ذہنی صحت اور ہڈیوں کی صحت سمیت مختلف موضوعات پر گفتگو ہوئی۔
ماہرین نے مینوپاز کی نگہداشت کو نیشنل ہیلتھ سسٹم کا حصہ بنانے پر زور دیا۔ انہوں نے طبی عملے کی تربیت اور ادویات تک رسائی بہتر بنانے کی بھی ہدایت کی۔ خواتین کی باقاعدہ طبی جانچ بہتر بنانے پر بھی زور دیا گیا۔
یونیورسٹی آف ہیلتھ سائنسز کے سابق وائس چانسلر پروفیسر جاوید اکرم کے مطابق مینوپاز کے دوران ہارمونز میں تبدیلی دل کی بیماری کا خطرہ بڑھا سکتی ہے۔ موٹاپے، ہائی بلڈ پریشر اور ذیابیطس میں مبتلا خواتین میں یہ خطرہ زیادہ ہوسکتا ہے۔
