کھیل کے ذریعے بچوں کو منہ اور دانتوں کی صفائی کی تربیت

کراچی میں بچوں کو کھیل اور عملی سرگرمیوں سے دانتوں اور منہ کی صفائی کی عادات سکھانے کے لیے ’جونیئر سمائل چیمپئن‘ ڈینٹل کیمپ منعقد کیا گیا۔ کیمپ کا انعقاد سپیک اینڈ سپیل سکولنگ سسٹم میں کیا گیا۔

ڈینٹل نیوز کے مطابق کیمپ میں بچوں کو ’سمائل پاسپورٹ‘ دیے گئے۔ مختلف سرگرمیوں سے انہیں صحت بخش غذا کے انتخاب، منہ اور دانتوں کی صفائی کے طریقے سکھائے گئے۔

بچوں نے جراثیم سے متعلق کھیلوں میں حصہ لیا، جبکہ ڈینٹل طلبہ اور ہاؤس آفیسرز نے ان کے دانتوں کا معائنہ کیا۔ سوال و جواب کی سرگرمی کے ذریعے بھی دانتوں کی صحت سے متعلق معلومات دی گئیں۔

پروگرام کے اختتام پر بچوں کو ’جونیئرسمائل چیمپئنز‘ کا اعزاز دیا گیا۔ منتظمین کے مطابق مقصد دانتوں اور منہ کی صحت سے متعلق آگاہی کو دلچسپ بنانا تھا۔