اسلام آباد میں 14 نومبر کو ذیابیطس آگاہی واک، شہریوں کو شرکت کی دعوت

ڈسٹرکٹ ہیلتھ آفس اسلام آباد کے تحت عالمی یومِ ذیابیطس پر آگاہی واک اور دوڑ کا اہتمام کیا گیا ہے۔ 14 نومبر کو یہ سرگرمی وزارتِ قومی صحت کے تعاون سے انجام دی جائے گی۔

اے پی پی کے مطابق، پروگرام ایف نائن پارک اسلام آباد میں دوپہر 2:30 سے شام 5 بجے تک جاری رہے گا۔ ذیابیطس آگاہی واک اور دوڑ ایف ٹین گیٹ کے قریب بارہ دری سے شروع ہوگی۔ شرکاء کے لیے اڑھائی اور پانچ کلومیٹر کی دوڑ رکھی گئی ہے۔

منتظمین کے مطابق، سرکاری پورٹل پر آن لائن رجسٹریشن کھول دی گئی ہے۔ شرکاء تقریب سے پہلے موقع پر بھی رجسٹریشن کروا سکیں گے۔ شہریوں اور فیملیز کو اس میں شرکت کی دعوت دی گئی ہے۔

سرگرمی کا مقصد جسمانی سرگرمی اور صحت مند طرزِ زندگی کو فروغ دینا ہے۔ اس دوران باقاعدہ ورزش، متوازن غذا اور بروقت صحت کی سکریننگ کی اہمیت اجاگر کی جائے گی۔