آنکھیں خشک ہونا (Dry eyes) وہ کیفیت ہے جس میں آنسوؤں کی پیداوار کم (Decreased tear production) ہو جاتی ہے۔ آنسو یا تو بنتے ہی کم ہیں یا ان کا معیار اچھا نہیں ہوتا۔ یہ حالت عموماً ہوائی جہاز یا ایئر کنڈیشن والے کمروں میں، کمپیوٹر استعمال کرتے یا سائیکل چلاتے ہوئے بڑھ جاتی ہے۔ اس سے آنکھوں میں بے آرامی، جلن یا خارش محسوس ہوتی ہے۔
علامات
٭ خشک آنکھوں کی عام علامات یہ ہیں:
٭ آنکھوں میں جلن یا خارش
٭ آنکھوں میں یا پلکوں کے کنارے کچھ چپچپا مادہ جمع ہونا
٭ روشنی سے حساسیت
٭ آنکھوں کی سرخی
٭ آنکھوں میں کوئی چیز محسوس ہونا
٭ کانٹیکٹ لینز پہننے میں مشکل ہونا
٭ رات کے وقت گاڑی چلانے میں مشکل
٭ آنکھوں سے پانی آنا (خشک آنکھوں کی وجہ سے جسم کا ری ایکشن)
٭ دھندلا دکھائی دینا یا آنکھوں کی تھکن
وجوہات
آنکھ کی اوپری سطح پر پانی، تیل اور بلغم کی ایک پتلی تہہ ہوتی ہے جو آنکھ کو نم اور ہموار رکھتی ہے۔ آنکھیں اس وقت خشک ہوتی ہیں جب یہ تہہ خراب ہو جائے۔ یہ تہہ تین پرتوں چربی، پانی اور بلغم نما مادے پر مشتمل ہوتی ہے۔ ان میں کسی بھی پرت میں مسئلہ خشک آنکھوں کا سبب بن سکتا ہے۔ اس کی وجوہات میں ہارمون کی تبدیلی، آٹو امیون ڈیزیز، پلکوں کی سوجن یا الرجی اور آنسو کم پیدا ہونا شامل ہیں۔
آنسو کی کمی
آنکھ میں پانی کی کمی، عمر رسیدگی، کچھ بیماریاں یا وٹامن A کی کمی، پارکنسن یا برتھ کنٹرول کی ادویات، اینٹی ہسٹامین، اینٹی ڈپریسنٹس کا زیادہ استعمال، اور آنکھ کے اعصاب کم حساس ہونا (کانٹیکٹ لینز یا لیزر سرجری کی وجہ سے) آنسو کی کمی کے اہم اسباب ہیں۔
پلکوں کی سوجن اور دیگر مسائل
کم پلکیں جھپکانا (مثلاً کمپیوٹر یا کتاب پڑھتے وقت)، پلکوں کی شکل میں مسئلہ (اندر یا باہر مڑ جانا)، اور آنکھ کی الرجی بھی خشک آنکھوں کا سبب بن سکتے ہیں۔
خطرات
آنکھیں خشک ہونا ان صورتوں میں زیادہ عام ہے:
٭ 50 سال سے زیادہ عمر
٭ خواتین میں، خاص طور پر حمل، مانع حمل ادویات، مینوپاز کے دوران
٭ وٹامن A یا اومیگا-3 کی کمی والے افراد
٭ کانٹیکٹ لینز پہننے والے یا نظر کی سرجری والے
پیچیدگیاں
اگر علاج نہ ہو تو آنکھ کے انفیکشن کا خطرہ بڑھتا ہے، آنکھ کی سطح خراب ہو سکتی ہے، کورنیئل السرز ہو سکتے ہیں، اور روزمرہ کے کام کرنا مشکل ہو سکتا ہے۔
ڈاکٹر سے کب رجوع کریں
اگر آنکھیں سرخ، تھکی ہوئی محسوس ہوں یا درد ہو تو ڈاکٹر سے رجوع کریں۔ ڈاکٹر آنکھوں کی جانچ کر کے اصل مسئلہ بتا سکتے ہیں۔
تشخیص
تشخیص کے لیے یہ عوامل استعمال کیے جاتے ہیں:
٭ آنکھوں کا معائنہ
٭ آنسو کی مقدار کی جانچ
٭ آنسو کے معیار کی جانچ
٭ آنکھ کے پانی کی جانچ (Tear osmolarity test)
٭ خون یا آنسو کے نمونوں میں علامات کی جانچ (مارکرز)
علاج
٭ کم یا کبھی کبھار خشک آنکھوں کے لیے بغیر نسخے والے آنکھ کے قطرے کافی ہیں
٭ شدید خشک آنکھوں کے لیے آنکھ کے نالی کے چھوٹے سوراخ سیلیکون پلگز سے بند کیے جاتے ہیں۔ اس کیفیت کے سبب کا علاج کیا جاتا ہے، اور مختلف دوائیں دی جاتی ہیں
سیلف کیئر
٭ پلکیں صاف رکھیں
٭ بغیر نسخے والے قطرے یا جیل استعمال کریں
٭ ضرورت کے مطابق پریزرویٹو یا نان پریزرویٹو قطرے منتخب کریں
٭ پلکوں کی ہلکی مالش کریں
احتیاطی تدابیر
٭ آنکھوں پر براہ راست ہوا نہ لگوائیں
٭ کمروں میں ہیومیڈیفائر استعمال کریں
٭ حفاظتی چشمہ پہنیں
٭ پڑھتے یا کمپیوٹر استعمال کرتے وقت وقفہ لیں
٭ کمپیوٹر سکرین کو اپنی آنکھوں سے تھوڑی نیچے سطح پر رکھیں
٭ سگریٹ نوشی سے بچیں
٭ مصنوعی آنسو استعمال کریں
نوٹ: یہ مضمون قارئین کی معلومات کے لیے شائع کیا گیا ہے۔ صحت سے متعلق امور میں اپنے معالج کے مشورے پر عمل کریں۔
