برین اے وی ایم: دماغ میں خون کی نالیوں کا الجھا ہوا جال

برین اے وی ایم (Brain AVM) یا برین آرٹیریو وینس مالفارمیشن (Brain arteriovenous malformation) دماغ میں خون کی نالیوں کا غیرمعمولی جال ہے۔ اس صورت میں خون باریک نالیوں سے گزرے بغیر براہِ راست شریانوں (آرٹریز) سے وریدوں (وینز) میں پہنچتا ہے۔

شریانیں دل سے آکسیجن والا خون دماغ تک پہنچاتی ہیں۔ وریدیں آکسیجن استعمال ہونے کے بعد خون واپس دل تک لے جاتی ہیں۔ وہاں سے خون آکسیجن حاصل کرنے کے لیے پھیپھڑوں میں جاتا ہے۔ برین اے وی ایم خون کی گردش کے اس قدرتی عمل میں خلل ڈالتا ہے۔

اے وی ایم جسم کے کسی بھی حصے میں ہوسکتا ہے، تاہم دماغ اور سپائنل کارڈ اس کے عام مقامات میں شامل ہیں۔ مجموعی طور پر برین اے وی ایم ایک نایاب بیماری ہے۔

علامات

بعض افراد میں برین اے وی ایم کی کوئی علامت ظاہر نہیں ہوتی۔ تقریباً نصف مریضوں میں غیرمعمولی نالیوں سے دماغ میں خون بہنا اس کی پہلی علامت ہوتا ہے۔ خون بہنے کے علاوہ یہ علامات بھی ظاہر ہوسکتی ہیں:

٭ دورے پڑنا

٭ سر درد یا سر کے کسی مخصوص حصے میں درد

٭ جسم کے کسی حصے میں پٹھوں کی کمزوری یا سن ہونا

سنگین علامات

٭ انتہائی شدید سر درد

٭ جسمانی کمزوری، سن ہونا یا فالج

٭ بینائی ختم ہونا

٭ بولنے میں دشواری

٭ الجھن یا دوسروں کی بات سمجھنے میں مشکل

٭ چلنے پھرنے میں دشواری

ڈاکٹر سے کب رجوع کریں

دورے، سر درد یا برین اے وی ایم کی دیگر علامات ظاہر ہونے پر جلد طبی معائنہ کروائیں۔ اچانک انتہائی شدید سر درد یا پہلی مرتبہ دورہ پڑنے پر فوری طبی امداد لیں۔ اچانک کمزوری، بینائی متاثر ہونے یا بولنے میں دشواری کو بھی ہنگامی حالت سمجھیں۔

برین اے وی ایم سے خون بہنا ایک خطرناک ہنگامی حالت ہے۔ اس میں فوری طبی امداد ضروری ہے۔

وجوہات

برین اے وی ایم کی اصل وجہ معلوم نہیں۔ محققین کے مطابق زیادہ تر افراد میں یہ پیدائش سے پہلے، رحمِ مادر میں نشوونما کے دوران بنتا ہے۔ بعض اوقات یہ زندگی کے بعد کے مراحل میں بھی پیدا ہوسکتا ہے۔

برین اے وی ایم بعض افراد میں ہیریڈیٹری ہیمرجک ٹیلینجیکٹیشیا نامی نایاب موروثی بیماری کے ساتھ پایا جاتا ہے۔ اسے اوسلر ویبر رینڈو سنڈروم بھی کہتے ہیں۔ یہ بیماری دماغ سمیت جسم کے مختلف حصوں میں خون کی نالیوں کی تشکیل کو متاثر کرتی ہے۔

خطرے کے عوامل

کوئی بھی شخص برین اے وی ایم کے ساتھ پیدا ہوسکتا ہے۔ تاہم بعض عوامل اس کا خطرہ بڑھا سکتے ہیں:

مرد ہونا: برین اے وی ایم مردوں میں زیادہ عام ہے۔

فیملی ہسٹری: شاذونادر صورتوں میں یہ کیفیت خاندان کے ایک سے زیادہ افراد میں پائی جاتی ہے۔ بعض موروثی بیماریاں بھی اس کا خطرہ بڑھاتی ہیں۔

پیچیدگیاں

برین اے وی ایم سے یہ پیچیدگیاں پیدا ہوسکتی ہیں:

دماغ میں خون بہنا: اے وی ایم متاثرہ شریانوں اور وریدوں کی دیواروں پر غیرمعمولی دباؤ ڈالتا ہے۔ اس سے نالیوں کی دیواریں کمزور یا پتلی ہوسکتی ہیں۔ نتیجتاً یہ پھٹ کر دماغ میں خون بہنے کا سبب بن سکتی ہیں۔ اسے ہیمرج کہتے ہیں

دماغی ٹشوز کو آکسیجن کی کمی: برین اے وی ایم میں خون کیپلریز یعنی باریک نالیوں کے جال سے نہیں گزرتا۔ اس کے بجائے خون تیزی سے شریانوں سے براہِ راست وریدوں میں پہنچتا ہے۔ اس سے اردگرد کے دماغی ٹشوز کو مناسب آکسیجن نہیں مل پاتی۔ آکسیجن کی کمی سے دماغی ٹشوز کمزور یا تباہ ہوسکتے ہیں۔ نتیجتاً کمزوری، سن ہونے، بینائی متاثر ہونے یا بولنے میں دشواری جیسی علامات ظاہر ہوسکتی ہیں

خون کی نالیوں کا کمزور ہونا: غیرمعمولی دباؤ سے خون کی نالی کی دیوار پر ابھار بن سکتا ہے۔ اسے اینیورزم کہتے ہیں۔ اس کے پھٹنے کا خطرہ بھی ہوتا ہے

دماغ کو نقصان پہنچنا: اے وی ایم کو خون پہنچانے کے لیے جسم مزید شریانیں استعمال کرسکتا ہے۔ اس سے بعض اے وی ایم بڑے ہوکر دماغ کے حصوں کو دبا سکتے ہیں۔ ان حصوں کی جگہ بھی بدل سکتی ہے۔ اس سے دماغ کے گرد موجود حفاظتی مائع کی معمول کی گردش متاثر ہوسکتی ہے۔ یہ مائع جمع ہونے سے دماغی ٹشوز پر دباؤ پڑتا ہے۔ نتیجتاً دماغی ٹشوز کھوپڑی کی ہڈی کی طرف دب سکتے ہیں۔

وین آف گیلن نامی بڑی رگ سے متعلق ایک مخصوص خرابی شیرخوار بچوں میں سنگین مسائل پیدا کرسکتی ہے۔ اس کی علامات پیدائش کے وقت یا فوراً بعد ظاہر ہوسکتی ہیں۔ دماغ میں پانی جمع ہونے سے سر بڑھ سکتا ہے۔ سر کی جلد پر ابھری ہوئی رگیں نظر آسکتی ہیں اور دورے بھی پڑ سکتے ہیں۔ متاثرہ بچوں کی نشوونما میں رکاوٹ آسکتی ہے اور ہارٹ فیلیئر بھی ہوسکتا ہے۔

تشخیص

ڈاکٹر علامات، میڈیکل ہسٹری اور جسمانی معائنے کی مدد سے ابتدائی جائزہ لیتا ہے۔ تشخیص کے لیے ان میں سے ایک یا زیادہ ٹیسٹ کیے جاسکتے ہیں:

٭ دماغی انجیوگرافی

٭ سی ٹی سکین

٭ ایم آر آئی

علاج

علاج کا اہم مقصد دماغ میں خون بہنے سے بچاؤ اور علامات کو قابو کرنا ہے۔ طریقے کا انتخاب مریض کی عمر، صحت اور اے وی ایم کے حجم اور مقام کے مطابق ہوتا ہے۔

آپریشن: بعض مریضوں میں آپریشن کے ذریعے اے وی ایم نکال دیا جاتا ہے۔ اس کا فیصلہ اے وی ایم تک رسائی اور آپریشن کے خطرات دیکھ کر کیا جاتا ہے۔

خون کی نالی کے ذریعے علاج: کیتھیٹر کے ذریعے اے وی ایم کو خون پہنچانے والی نالیوں میں مخصوص مادہ داخل کیا جاتا ہے۔ اس سے خون کا بہاؤ کم یا بند ہوجاتا ہے۔ یہ طریقہ آپریشن یا شعاعوں سے علاج سے پہلے بھی استعمال ہوسکتا ہے

مخصوص شعاعوں سے علاج: سٹیریوٹیکٹک ریڈیوسرجری میں شعاعیں اے وی ایم کی غیرمعمولی نالیوں پر مرکوز کی جاتی ہیں۔ اس سے نالیوں میں داغ بنتے ہیں اور وہ بتدریج بند ہوتی ہیں۔ اس عمل میں 1 سے 3 سال لگ سکتے ہیں

ادویات: سر درد یا دوروں جیسی علامات قابو کرنے کے لیے ادویات دی جاسکتی ہیں

مانیٹرنگ: علامات نہ ہونے، معمولی ہونے یا علاج کا خطرہ زیادہ ہونے پر ڈاکٹر باقاعدہ مانیٹرنگ تجویز کرسکتا ہے۔ اس میں باقاعدگی سے طبی معائنہ کیا جاتا ہے

Frequently Asked Questions (FAQs)

کیا برین اے وی ایم پیدائش کے بعد بھی بن سکتا ہے؟

جی ہاں، زیادہ تر افراد میں یہ کیفیت پیدائش سے موجود ہوتی ہے۔ تاہم زندگی کے بعد کے مراحل میں بھی بن سکتی ہے۔

کیا برین اے وی ایم سے ہر سال خون بہنے کا خطرہ ہوتا ہے؟

خون بہنے کا سالانہ خطرہ تقریباً 2 سے 3 فیصد ہوتا ہے۔ بعض مریضوں میں یہ خطرہ زیادہ ہوسکتا ہے۔

کیا برین اے وی ایم کا علاج کھلے آپریشن کے بغیر ممکن ہے؟

جی ہاں، بعض مریضوں میں کیتھیٹر کے ذریعے علاج یا ریڈیوسرجری استعمال کی جاسکتی ہے۔ موزوں طریقے کا فیصلہ ماہر ڈاکٹر کرتا ہے۔

نوٹ: یہ مضمون صرف قارئین کی معلومات کے لیے شائع کیا گیا ہے۔ مزید معلومات کے لیے شفا انٹرنیشنل ہسپتال کے ڈاکٹرز سے رجوع کریں۔

ڈاکٹر سے رابطے کے لیے لنک پر کلک کریں ⬇️

https://www.shifa.com.pk/find-a-doctor?speciality=neurosurgery