آٹزم کے شکار افراد میں پارکنسن کی شرح زیادہ، تحقیق

آٹزم کے شکار درمیانی عمر کے اور بزرگ افراد میں پارکنسنز کے امکانات دیگر افراد کے مقابلے میں زیادہ ہوتے ہیں۔ یہ بات جارج واشنگٹن یونیورسٹی سمیت مختلف اداروں کی ایک مشترکہ تحقیق میں سامنے آئی۔ 

محققین نے 45 سال یا زائد عمر کے تقریباً 5 کروڑ 70 لاکھ امریکیوں کے میڈیکل ریکارڈ کا جائزہ لیا۔ اعدادوشمار 2017 سے 2019 کے تھے۔ صرف آٹزم والے گروہ میں پارکنسن ازم کی شرح 3.83 فیصد تھی۔ آٹزم یا ذہنی معذوری کے بغیر تقابلی گروہ میں شرح 1.57 فیصد رہی۔ پارکنسنزم ایسی حرکتی علامات کا مجموعہ ہے، جن میں کپکپی اور حرکت کی سستی شامل ہیں۔

صرف ذہنی معذوری والے افراد میں شرح 4.32 فیصد ریکارڈ ہوئی۔ آٹزم اور ذہنی معذوری دونوں رکھنے والوں میں یہ شرح سب سے زیادہ، یعنی 4.86 فیصد تھی۔ بعض ادویات بھی پارکنسن ازم پیدا کر سکتی ہیں۔ ایسی ادویات لینے والوں کو تجزیے سے نکالنے کے بعد بھی شرح زیادہ رہی۔

جریدے ’’آٹزم‘‘ میں شائع تحقیق دونوں کیفیات میں تعلق ظاہر کرتی ہے۔ تاہم، اس سے ثابت نہیں ہوتا کہ آٹزم پارکنسنزم کا سبب بنتا ہے۔