ٹریکیوسٹومی (Tracheostomy) ایک سرجیکل پروسیجر ہے جس میں گردن کے اگلے حصے میں سوراخ بنا کر اسے ہوا کی نالی (ٹریکیا) تک کھولا جاتا ہے اور اس میں ایک خاص ٹیوب ڈالی جاتی ہے تاکہ سانس کا راستہ مستقل یا عارضی طور پر کھلا رہے۔ اس عمل کو ٹریکیوٹومی بھی کہا جاتا ہے۔
یہ طریقہ اس وقت اختیار کیا جاتا ہے جب سانس لینے کا عام راستہ شدید طور پر متاثر یا بند ہو جائے۔ اکثر یہ ان مریضوں میں ضروری ہوتا ہے جنہیں طویل مدت تک وینٹی لیٹر کی مدد درکار ہو۔ بعض صورتوں میں گردن یا چہرے کی سوجن، سرجری یا شدید چوٹ کے باعث وقتی طور پر سانس کا متبادل راستہ بنایا جاتا ہے۔ ہنگامی حالات میں یہ عمل فوری طور پر بند سانس کی نالی کھولنے کے لیے کیا جاتا ہے۔
جب اس کی ضرورت باقی نہ رہے تو سوراخ خود بند ہو سکتا ہے یا سرجری کے ذریعے بند کیا جاتا ہے، تاہم بعض مریضوں میں یہ مستقل بھی رہ سکتا ہے۔
کیوں کی جاتی ہے
٭ جب مریض کو طویل عرصے تک وینٹی لیٹر کی ضرورت ہو
٭ جب کینسر یا فالج کی وجہ سے سانس کی نالی تنگ یا بند ہو جائے
٭ جب اعصابی کمزوری کے باعث بلغم باہر نکالنا مشکل ہو جائے اور سکشن کی ضرورت پڑے
٭ بڑے سر یا گردن کے آپریشن کے دوران سانس کی حفاظت کے لیے ٹریکیوسٹومی کی جاتی ہے
٭ سر یا گردن کی شدید چوٹ یا حادثہ سانس کی معمول کی نالی بند کر دے
٭ ہنگامی حالت میں منہ کے ذریعے ٹیوب ڈالنا ممکن نہ رہے
ہنگامی طریقہ کار
زیادہ تر ٹریکیوسٹومی ہسپتال میں کی جاتی ہے، تاہم بعض اوقات حادثے کی جگہ فوری کارروائی کرنا پڑتی ہے۔ یہ ہنگامی عمل زیادہ پیچیدہ اور خطرناک ہوتا ہے۔
اس کے مقابلے میں کریکوٹائیروٹومی نسبتاً آسان طریقہ ہے جس میں گردن کے اوپری حصے میں آواز کے ڈبے کے نیچے سوراخ بنایا جاتا ہے۔ مریض کی حالت مستحکم ہونے پر اسے باقاعدہ ٹریکیوسٹومی سے تبدیل کر دیا جاتا ہے۔
ممکنہ خطرات
ٹریکیوسٹومی عام طور پر محفوظ عمل ہے، تاہم پیچیدگیوں کا امکان موجود رہتا ہے اور ہنگامی حالات میں یہ خطرات بڑھ جاتے ہیں۔
فوری پیچیدگیاں
٭ خون بہنا
٭ گردن کے اعصاب، تھائیرائڈ یا ہوا کی نالی کو نقصان
٭ ٹیوب کا غلط جگہ منتقل ہونا
٭ جلد کے نیچے ہوا جمع ہونا جس سے سانس متاثر ہو سکتا ہے
٭ سینے میں ہوا جمع ہو کر پھیپھڑوں پر دباؤ ڈالنا
٭ گردن میں خون جمع ہو کر سانس کی نالی کو دبانا
طویل مدتی پیچیدگیاں
٭ ٹیوب کا بند ہونا یا ہٹ جانا
٭ ہوا کی نالی میں داغ یا تنگی پیدا ہونا
٭ سانس اور غذائی نالی کے درمیان غیر معمولی راستہ بن جانا
٭ بڑی شریان کے ساتھ غیر معمولی رابطہ بننے سے شدید خون بہنے کا خطرہ
٭ سانس کی نالی یا پھیپھڑوں میں انفیکشن
گھر پر مریض کے لیے توجہ طلب علامات
گھر پر موجود مریض میں درج ذیل علامات ظاہر ہوں تو فوری طور پر طبی رابطہ ضروری ہے:
٭ ٹیوب یا گردن کے سوراخ سے خون آنا
٭ سانس لینے میں دشواری
٭ درد یا حالت میں اچانک تبدیلی
٭ گردن کے گرد سوجن یا رنگت میں تبدیلی
٭ ٹیوب کی پوزیشن میں تبدیلی
تیاری
پروسیجر سے پہلے مریض کی حالت کے مطابق ہدایات دی جاتی ہیں۔ جنرل اینستھیزیا کی صورت میں چند گھنٹے پہلے کھانا پینا بند کرنا ضروری ہوتا ہے اور بعض دوائیں عارضی طور پر روک دی جاتی ہیں۔
مریض کو آرام دہ کپڑے اور ذاتی استعمال کی اشیاء ساتھ رکھنے کا مشورہ دیا جاتا ہے کیونکہ ابتدائی طور پر بولنا ممکن نہیں ہوتا۔
پروسیجر کے دوران
ٹریکیوسٹومی عام طور پر جنرل اینستھیزیا کے تحت کی جاتی ہے، تاہم بعض حالات میں مریض کو جزوی طور پر ہوش میں رکھا جاتا ہے۔
سرجیکل طریقہ
گردن کے نچلے حصے میں کٹ لگا کر پٹھے ہٹا کر ہوا کی نالی میں سوراخ بنایا جاتا ہے۔
کم کٹس والا طریقہ
چھوٹا کٹ لگا کر کیمرے یا لینس کی مدد سے اندر دیکھا جاتا ہے اور سوئی کے ذریعے سوراخ بنا کر اسے ٹیوب کے مطابق وسیع کیا جاتا ہے۔ دونوں صورتوں میں ٹیوب کو گردن پر پٹی یا ٹانکوں کے ذریعے محفوظ کیا جاتا ہے
پروسیجر کے بعد نگہداشت
٭ مریض چند دن ہسپتال میں زیرِ نگرانی رہتا ہے اور اسے سیلف کیئر کی تربیت دی جاتی ہے
٭ ٹیوب کی صفائی اور تبدیلی سکھائی جاتی ہے تاکہ انفیکشن سے بچا جا سکے
٭ بولنے کی صلاحیت بحال کرنے کے لیے مختلف طریقے اور آلات استعمال کیے جاتے ہیں
٭ ابتدائی طور پر مریض کو غذائی ضروریات ورید یا فیڈنگ ٹیوب کے ذریعے فراہم کی جاتی ہیں کیونکہ اس دوران نگلنا مشکل ہو سکتا ہے
٭ خشک ہوا سے بچاؤ کے لیے ہوا میں نمی بڑھانے والے آلات استعمال کیے جاتے ہیں
٭ بلغم صاف کرنے کے لیے سکشن مشین کا استعمال سکھایا جاتا ہے
نتائج
زیادہ تر مریضوں میں ٹریکیوسٹومی عارضی ہوتی ہے۔ اگر طویل مدت درکار ہو تو یہ مستقل حل بھی بن سکتی ہے۔ ڈاکٹر مریض کی حالت کے مطابق ٹیوب نکالنے کا فیصلہ کرتے ہیں۔ سوراخ خود بھی بند ہو سکتا ہے یا سرجری کے ذریعے بند کیا جاتا ہے۔
نوٹ: یہ مضمون صرف قارئین کی معلومات کے لیے شائع کیا گیا ہے۔ صحت سے متعلق امور میں ہمیشہ اپنے معالج کے مشورے پر عمل کریں۔
ڈاکٹر سے رابطے کے لیے لنک پر کلک کریں ⬇️
https://www.shifa.com.pk/find-a-doctor?speciality=ent-specialist
