کراچی میں نوجوان کا کورنیا عطیہ، دو افراد کی آنکھیں روشن

17 سالہ طالب علم شیر علی کے کورنیا عطیہ کرنے سے دو افراد کی بینائی بحال ہو گئی۔ شیر علی دماغ کی رگ پھٹنے کے باعث سندھ انسٹی ٹیوٹ آف یورولوجی اینڈ ٹرانسپلانٹیشن (ایس آئی یو ٹی) لائے گئے۔ دو دن کی مسلسل کوششوں کے باوجود ان کی طبیعت نہ سنبھلی۔ بالاۤخر ڈاکٹروں نے انہیں دماغی طور پر مردہ قرار دے دیا۔

شیر علی کا ایس آئی یو ٹی سے تعلق بہت گہرا تھا۔ آٹھ سال کی عمر میں ان کی والدہ نے انہیں گردہ عطیہ کیا جو تقریباً 10 سال تک کام کرتا رہا۔ بعد ازاں وہ دوبارہ ڈائلیسز پر آ گئے جہاں دوسری بار پیوندکاری ان کی منتظر تھی۔

غم کی اس گھڑی میں ان کی فیملی نے ان کے اعضاء عطیہ کرنے کا فیصلہ کیا۔ سات جنوری کو شیر علی کے کورنیا عطیہ کے ذریعے دو افراد کی آنکھیں روشن ہو گئیں۔ ان میں 45 سالہ شخص اور 21 سالہ طالب علم شامل ہیں۔