روزانہ ایک میٹھا مشروب یا سافٹ ڈرنک پینا معدے کے کینسر کے خطرے میں دوگنا سے زیادہ اضافے سے منسلک پایا گیا ہے۔ یہ بات امریکا میں ہونے والی ایک طبی تحقیق میں سامنے آئی۔
یہ تحقیق گاسٹرو ہیپ ایڈوانسز نامی طبی جریدے میں شائع ہوئی۔ ماس جنرل بریگھم کینسر انسٹی ٹیوٹ کے محققین نے ایک لاکھ 12 ہزار سے زائد افراد کے طبی اور غذائی ریکارڈ کا جائزہ لیا۔ شرکا کی صحت کا کئی دہائیوں تک مشاہدہ کیا گیا. وزن، جسمانی سرگرمی، تمباکو نوشی اور دیگر عوامل بھی مدنظر رکھے گئے۔
اس دوران 278 افراد میں معدے کے کینسر کی تشخیص ہوئی۔ نتائج میں سامنے آیا کہ روزانہ ایک میٹھا مشروب استعمال کرنے والے افراد میں معدے کے کینسر کا خطرہ ان افراد کے مقابلے میں دوگنا سے زیادہ تھا جو ایسے مشروبات استعمال نہیں کرتے تھے۔
معدے کا کینسر ماضی میں زیادہ تر بڑی عمر کے افراد سے منسلک سمجھا جاتا تھا. تاہم 50 سال سے کم عمر افراد میں بھی اس کے کیسز بڑھ رہے ہیں۔
