لاڑکانہ میں 600 بستروں پر مشتمل جدید ہسپتال کی منظوری

وزیراعلیٰ سندھ سید مراد علی شاہ نے لاڑکانہ میں 600 بستروں پر مشتمل جدید ہسپتال کی منظوری دے دی ہے۔ منصوبے کی تکمیل دو سال میں متوقع ہے اور سنگِ بنیاد مارچ 2026 میں رکھا جائے گا۔ پہلے ٹاور کی تعمیر ایک سال میں اور دوسرے ٹاور کی تعمیر اگلے سال مکمل ہوگی۔

ہسپتال چھ منزلہ اور ایک بیسمنٹ پر مشتمل ہوگا۔ پہلے مرحلے میں 288 نرسنگ، 92 ایمرجنسی اور 48 آئی سی یو بستروں کی سہولت فراہم کی جائے گی۔ دوسرے مرحلے میں 144 نرسنگ اور 24 آئی سی یو بستروں کا اضافہ ہوگا۔ ہسپتال میں جدید ایمرجنسی سروسز، آؤٹ پیشنٹ شعبہ، ریڈیالوجی، ڈائیلیسز یونٹس، بلڈ بینک، آٹھ آپریشن تھیٹرز اور خصوصی آئی سی یوز ہوں گے۔

اجلاس میں وزیر صحت ڈاکٹر عذرا فضل پیچوہو، چیف سیکریٹری آصف حیدر شاہ اور دیگر افسران شریک ہوئے۔ لاڑکانہ کے کمشنر نے ویڈیو لنک کے ذریعے اجلاس میں شرکت کی۔