پلانٹر فیشیائٹس: ایڑی کا درد

ایڑی کا درد (Plantar Fasciitis) پاؤں کے نچلے حصے میں موجود ایک مضبوط ٹشو (پلانٹر فیشیا) کی سوزش کی وجہ سے ہوتا ہے جو ایڑی کی ہڈی کو انگلیوں سے جوڑتی ہے۔ اس کی وجہ سے روزمرہ چلنے پھرنے میں دشواری ہو سکتی ہے اور یہ مسئلہ زیادہ تر دوڑنے والے افراد اور زیادہ وزن رکھنے والوں میں دیکھا جاتا ہے۔

علامات

پلانٹر فیشیائٹس کی عام علامات یہ ہو سکتی ہیں:

٭ ایڑی کے قریب پاؤں کے نچلے حصے میں شدید درد ہونا

٭ صبح اٹھ کر پہلے قدموں کے ساتھ درد زیادہ ہونا

٭ زیادہ دیر کھڑے رہنے کے بعد درد ہونا

٭ کافی دیر بیٹھنے کے بعد کھڑے ہونے پر درد ہونا

وجوہات

پلانٹر فیشیائٹس اس وقت ہوتا ہے جب ایڑی کو انگلیوں سے ملانے والی مضبوط ٹشو پر بار بار کھچاؤ یا دباؤ پڑے جس سے معمولی چوٹ، جلن یا سوزش پیدا ہو جاتی ہے۔ تاہم بعض اوقات اس کی واضح وجہ معلوم نہیں ہوتی۔

خطرے کے عوامل

40 سے 60 سال کی عمر کے افراد میں پلانٹر فیشیائٹس کا خطرہ زیادہ ہوتا ہے۔ اس کے علاوہ یہ عوامل بھی اس خطرے کو بڑھا سکتے ہیں:

٭ زیادہ دوڑنا، بیلے یا ایروبک ڈانس کرنا

٭ چپٹے پاؤں، اونچا فٹ آرچ یا چلنے کا غیر معمولی انداز ہونا

٭ موٹاپا 

٭ زیادہ دیر کھڑے رہنا یا چلنا 

پیچیدگیاں

اگر پلانٹر فیشیائٹس کا علاج نہ کیا جائے تو ایڑی کا درد مستقل ہو سکتا ہے، جس سے چلنے پھرنے میں دشواری اور پاؤں، گھٹنے، کولہے یا کمر کے مسائل پیدا ہو سکتے ہیں۔

تشخیص

تشخیص کے لیے ڈاکٹر علامات، میڈیکل ہسٹری اور جسمانی معائنہ کرتے ہیں۔ ضرورت پڑنے پر متعلقہ حصے کا ایکس رے یا ایم آر آئی بھی کی جا سکتی ہے تاکہ درد کی کسی دوسری وجہ کو معلوم ہوسکے۔

علاج

پلانٹر فیشیائٹس کے علاج میں یہ اقدامات کیے جا سکتے ہیں:

٭ آرام کرنا، برف لگانا اور درد بڑھانے والی سرگرمیوں سے پرہیز کرنا

٭ درد اور سوزش کم کرنے کے لیے ادویات استعمال کرنا

٭ فزیوتھیراپی اور کھچاؤ والی ورزشیں کرنا

٭ نائٹ سپلنٹ یا آرتھوٹس (جوتے کے سپورٹ) استعمال کرنا

٭ ضرورت پڑنے پر واکنگ بوٹ، چھڑی کا استعمال کرنا

٭ ضرورت پڑنے پر انجیکشن یا شاک ویو تھیراپی کروانا

٭ شدید صورت میں سرجری کروانا

Frequently Asked Questions (FAQs)

کیا پلانٹر فیشیائٹس خود ٹھیک ہو سکتی ہے؟

جی ہاں، زیادہ تر مریض مناسب آرام، ورزش اور سادہ علاج سے چند ماہ میں بہتر ہو جاتے ہیں۔

کیا ایڑی میں موجود بون اسپر ہی درد کی وجہ ہوتا ہے؟

ضروری نہیں۔ بہت سے لوگوں میں بون اسپر موجود ہوتا ہے لیکن انہیں ایڑی میں درد نہیں ہوتا۔

کیا موٹاپا پلانٹر فیشیائٹس کا خطرہ بڑھاتا ہے؟

جی ہاں، زیادہ وزن پلانٹر فیشیا پر اضافی دباؤ ڈالتا ہے، جس سے اس بیماری کا خطرہ بڑھ جاتا ہے۔

نوٹ یہ مضمون صرف معلوماتی مقاصد کے لیے ہے۔ اگر ایڑی کا درد شدید ہو، مسلسل برقرار رہے یا روزمرہ کی سرگرمیوں میں رکاوٹ بنے تو اپنے ڈاکٹر سے ضرور مشورہ کریں۔

ڈاکٹر سے رابطے کے لئے لنک پر کلک کریں ⬇️

https://www.shifa.com.pk/find-a-doctor?speciality=orthopedic