نپاہ وائرس سے پاکستان کو براہ راست خطرہ نہیں، ماہرین

ماہرین کا کہنا ہے کہ نپاہ وائرس پاکستان کے شہریوں کیلئے براہِ راست خطرہ نہیں ہے۔ انہوں نے یہ بات وبائی امراض کے حوالے سے کراچی میں منعقدہ ایک گول میز کانفرنس میں کہی۔

متعدی امراض کے ماہرین کے مطابق نپاہ وائرس زیادہ تر جانوروں سے انسانوں میں منتقل ہوتا ہے۔ انسان سے انسان میں اس کی منتقلی انتہائی محدود ہے۔ جنوری 2026 تک بھارت کے مغربی بنگال میں صرف دو ہیلتھ ورکرز اس سے متاثر ہوئے۔ ایک صحت یاب ہو گیا جبکہ دوسرا وینٹی لیٹر پر ہے۔ 190 قریبی رابطوں کے ٹیسٹ منفی آئے، اور پاکستان کے متصل علاقوں میں کوئی کیس رپورٹ نہیں ہوا۔

نپاہ وائرس متاثرہ چمگادڑوں یا آلودہ خوراک سے منتقل ہو سکتا ہے۔ ماہرین نے کہا کہ صفائی اور صحت کے معیار کو بہتر بنا کر خطرات کم کیے جا سکتے ہیں۔ ہیلتھ ورکرز کو خصوصی احتیاط برتنے کی ضرورت ہے۔