منہ میں زخم

السرگول یا بیضوی شکل کے چھالے یا زخم ہیں۔ یہ جسم میں کہیں بھی بن سکتے ہیں تاہم منہ کے السرعموماً ہونٹ، زبان، اندرونی گال اورتالو وغیرہ پرہی بنتے ہیں۔ ان کی موجودگی تکلیف دہ ہونے کے ساتھ ساتھ کھانے پینے اوربولنے میں بھی مشکل کا باعث بنتی ہے۔ زیادہ ترافراد میں ان کا دورانیہ ایک سے دو ہفتوں تک ہوتا ہے۔ اس عرصے میں یہ بغیرکسی علاج کے ہی ٹھیک ہوجاتے ہیں۔ اگردو ہفتے سے زائد عرصے میں چھالے مندمل نہ ہوں، ابھی پہلے والا ٹھیک نہ ہوا ہواور مزید چھالے بننا شروع ہو جائیں اوراس کے ساتھ بخاریا اسہال کی بھی شکایت ہو توماہر دندان سے رابطہ کریں۔

عام وجوہات

 مرچ اورگرم مسالوں کا بے جا استعمال معدے میں تیزابیت کا باعث بنتا ہے۔ زیادہ ترصورتوں میں یہی تیزابیت منہ میں چھالوں کا سبب بنتی ہے۔ منہ کے السرکی اصل وجہ کا تعین تو مشکل ہے تاہم ان عوامل کو اس سے وابستہ خیال کیا جاتا ہے

٭وٹامن بی 12، آئرن، فولک ایسڈ کی کمی ہونا۔

٭منہ اوردانتوں کی مکمل اورباقاعدہ صفائی نہ ہونا۔

٭رگڑ رگڑ کربرش کرنا یا سخت اورناقص برش کا استعمال کرنا۔ یہ دانتوں کی ساخت متاثرکرتا ہے بلکہ اس کے باقاعدہ استعمال سے مسوڑے بھی زخمی ہوجاتے ہیں۔

٭عموماً جلدی جلدی کھانے یا ویسے ہی کھیل کود کے دوران گال کے اندرونی حصے کا دانتوں کے درمیان آجانا۔

٭مخصوص ادویات کا استعمال کرنا۔

٭کیفین مثلاً چائے‘ کافی‘ بلیک چاکلیٹ کا زیادہ استعمال ۔

٭ ہارمونزکا غیرمتوازن ہونا ۔

٭ذہنی تناؤ،اضطراب اورڈپریشن کا شکار ہونا۔

٭منہ میں بیکٹیریا‘ وائرس اورانفیکشنزہونا۔

٭کچھ بیماریوں مثلاً ذیابیطس، سی لئک ،آئی بی ڈی اورخون کی رگوں میں سوجن کا شکارہونا۔٭قوت مدافعت کمزور ہونا ۔

٭ ڈینٹل بریسز کے استعمال کی وجہ سے کھانے پینے یا بولنے کے دوران مسوڑھوں پررگڑ لگ جانا۔

علاج

السرکے علاج میں پہلی ترجیح درد کی شدت میں کمی لانا ہوتا ہے۔ اس کے لئے کھانے اورزخموں پرلگانے کے لئے ادویات دی جاتی ہیں۔ یہ صحت یابی کے عمل میں تیزی اوردرد میں کمی لاتی ہیں۔

منہ کی صحت کوبرقرار رکھنے کے لئے روزانہ رات کوسونے سے پہلے یا کھانے کے بعد ایک گلاس نیم گرم پانی میں نمک ڈال کرغرارے کریں یا ڈاکٹرکا تجویز کردہ ماؤتھ واش استعمال کریں۔ السر کی وجہ معدے کی خرابی ہوتواس کے لئے ادویات دی جاتی ہیں۔ مزیدبرآں غذائی کمی کو پورا کرنے کے لئے مختلف سپلی منٹس بھی ڈاکٹر کے مشورے سے کھائے جاسکتے ہیں۔

بچاؤ کی تدابیر

٭ایسی تمام اشیاء سے پرہیز کریں جو منہ کے السر یا منہ اورحلق کے سرطان کا باعث بن سکتی ہوں۔ ان میں سگریٹ نوشی‘ الکوحل کا استعمال اورنسواریا تمباکو چبانا شامل ہیں۔

٭اپنے جسم کی صفائی کے ساتھ منہ کی صفائی کا بھی خصوصی خیال رکھیں۔ ٹوتھ برش ہرتین ماہ بعد تبدیل کر دیں

٭ڈینٹل فلاس کا استعمال لازماً کریں۔

٭سال میں ایک بار دانتوں کے معائنے کے لئے ڈاکٹر کے پاس ضرور جائیں۔

mouth ulcers, causes of mouth sores, treatment of ulcers, mouth ulcer prevention