گیسٹرائٹس (Gastritis) معدے کی سوزش کو کہا جاتا ہے، جو مختلف وجوہات کی بنا پر پیدا ہو سکتی ہے۔ یہ کیفیت اچانک بھی ہو سکتی ہے یا وقت کے ساتھ آہستہ آہستہ بھی بڑھ سکتی ہے۔ بعض صورتوں میں یہ معدے کے السر یا معدے کے کینسر کے خطرے میں اضافہ کر سکتی ہے، تاہم زیادہ تر افراد میں مناسب علاج سے اس میں جلد بہتری آ جاتی ہے۔
علامات
گیسٹرائٹس کی یہ علامات ہو سکتی ہیں:
٭ پیٹ کے اوپری حصے میں جلن یا درد ہونا
٭ متلی محسوس ہونا
٭ الٹی آنا
٭ کھانا کھانے کے بعد پیٹ بھرا ہوا محسوس ہونا
ڈاکٹر سے کب رجوع کریں؟
اگر معدے کی سوزش کی علامات ایک ہفتے یا اس سے زیادہ رہیں تو ڈاکٹر کو دکھائیں۔ تاہم شدید درد، بار بار الٹی، خون کی الٹی، درد کش ادویات وغیرہ لینے کے بعد معدے میں تکلیف ہونے کی صورت میں فوراً طبی امداد حاصل کریں۔
وجوہات
گیسٹرائٹس معدے کی اندرونی جھلی میں سوزش اس وقت ہوتی ہے جب معدے کی حفاظتی تہہ کمزور یا متاثر ہو جائے جس سے ہاضمے کے تیزابی مادے معدے کی جھلی کو نقصان پہنچاتے ہیں۔ بعض بیماریاں، جیسے کرونز ڈیزیز بھی اس کا خطرہ بڑھا سکتی ہیں۔
خطرے کے عوامل
بڑھتی عمر میں گیسٹرائٹس کا خطرہ زیادہ ہوتا ہے۔ اس کے علاوہ یہ عوامل بھی خطرہ بڑھا سکتے ہیں:
٭ H. pylori بیکٹیریا کا انفیکشن ہونا
٭ پین کلرز کا بار بار یا زیادہ استعمال کرنا
٭ زیادہ مقدار میں الکحل استعمال کرنا
٭ شدید ذہنی یا جسمانی دباؤ کا سامنا کرنا
٭ کیموتھراپی یا ریڈی ایشن تھراپی کروانا
٭ آٹو امیون بیماری یا وٹامن B12 کی کمی ہونا
٭ HIV/AIDS، کرونز بیماری، سیلیک بیماری، سارکوئیڈوسس یا پیراسائٹ انفیکشن جیسی بیماریاں ہونا
پیچیدگیاں
اگر گیسٹرائٹس کا علاج نہ کیا جائے تو معدے کے السر، خون بہنے یا کچھ صورتوں میں معدے کے کینسر کا خطرہ بڑھ سکتا ہے۔
تشخیص
گیسٹرائٹس کی تشخیص کے لیے ڈاکٹر علامات، میڈیکل ہسٹری اور جسمانی معائنہ کرتے ہیں۔ اصل وجہ جاننے کے لیے ایچ پائلوری کی جانچ، اینڈوسکوپی اورایکس رے وغیرہ بھی کیا جا سکتا ہے۔
علاج
گیسٹرائٹس کے علاج میں یہ اقدامات کیے جا سکتے ہیں:
٭ اگر وجہ پین کلرز یا الکحل ہو تو ان کا استعمال بند کرنا
٭ H. pylori انفیکشن کے لیے اینٹی بایوٹکس
٭ معدے کی تیزابیت کم کرنے والی ادویات استعمال کرنا
ڈاکٹر کی ہدایت کے مطابق علاج مکمل کرنا اور ضرورت پڑنے پر دوبارہ H. pylori ٹیسٹ بھی کیا جاسکتا ہے۔
Frequently Asked Questions (FAQs)
کیا گیسٹرائٹس اور معدے کا السر ایک ہی بیماری ہیں؟
نہیں، گیسٹرائٹس معدے کی سوزش ہے، جبکہ یہ بعض اوقات السر کا سبب بن سکتی ہے۔
کیا گیسٹرائٹس مکمل طور پر ٹھیک ہو سکتی ہے؟
جی ہاں، زیادہ تر مریض مناسب علاج سے بہتر ہو جاتے ہیں۔
کیا گیسٹرائٹس کا علاج نہ کروانے سے مسئلہ بڑھ سکتا ہے؟
جی ہاں، علاج نہ ہونے پر السر، معدے سے خون آنا یا دیگر پیچیدگیاں ہو سکتی ہیں۔
نوٹ: یہ مضمون صرف قارئین کی معلومات کے لیے شائع کیا گیا ہے۔ صحت سے متعلق امور میں ہمیشہ اپنے معالج کے مشورے پر عمل کریں۔
