چہرے پرزخم: ابتدائی طبی امداد
کھیلوں اوردیگرجسمانی سرگرمیوں کے دوران بعض اوقات بڑوں، خصوصاً بچوں کے جسم پرنوکیلی یا تیزدھاراشیاء سےکٹ لگ جاتے ہیں اورزخم بن جاتا ہے۔ ان میں سے بعض کاعلاج گھر پرہی ابتدائی طبی امداد سے ممکن ہوتا ہے تاہم اگر یہ گہرے ہوں تو ڈاکٹر سے رابطے کی ضرورت پیش آسکتی ہے۔ چہرے جیسے حساس حصے پریہ مسئلہ ہونے کی صورت میں ذیل میں بیان کردہ ہدایات پرعمل کریں۔
جلد کی سطح پرزخم
٭اپنے ہاتھوں کو اچھی طرح دھوئیں۔
٭خون کو روکنے کے لئے صاف کپڑے یا پٹی سے زخم پرکچھ منٹ تک دباؤ ڈالیں۔ اگر خون زیادہ بہنےلگے تو 3 سے10منٹ دباؤ ڈالنے کی ضرورت پیش آسکتی ہے۔ اس دوران یہ دیکھنے کے لئے کہ خون رکا ہے یا نہیں بار بارکپڑا ہرگز نہ ہٹائیں ۔اگر ایک کپڑاخون سے آلودہ ہوجائے تو اس کے اوپر ہی دوسرا بھی رکھ دیں۔
٭صابن اورپانی سے زخم کو دھوتے ہوئے دھیان رکھیں کہ یہ آنکھوں میں نہ جائیں۔
٭اگرزخم پر بظاہر کوئی چیز نظر آرہی ہو تو اسے آرام سے نکال دیں۔
٭زخم کورگڑ کرصاف نہ کریں بلکہ کچھ دیرکے لئے متاثرہ حصے پرپانی بہاتے رہیں،اس لئے کہ گندگی سے انفیکشن کا خطرہ ہوتا ہے۔
٭زخم پرجراثیم صاف کرنے والا کوئی لوشن یا کریم لگائیں۔ اس کے لئے الکوحل سویب بھی استعمال کر سکتے ہیں۔ یہ بازارسے با آسانی مل جاتے ہیں۔
٭اس پرچپکنے والی پٹی یعنی سنی پلاسٹ یا کوئی دوسری پٹی لگائیں اوراسے باقاعدگی سے تبدیل کرتے رہیں۔
٭زخم کو خشک اورصاف رکھیں۔
٭اس پر پھونک ہرگز نہ ماریں کیونکہ اس سےبھی جراثیم پیدا ہوسکتے ہیں۔
٭اگرکوئی آلودہ چیززخم کا سبب بنے تو 24 سے 48گھنٹوں میں تشنج کا ٹیکہ ضرور لگوائیں۔
٭اگر چوٹ کے نتیجے میں چہرے پرسوجن یا چھالے ظاہر ہونے لگیں تو متاثرہ حصے پر10 سے 15 منٹ کے لئے برف کی تھیلی رکھیں۔ یہ عمل ہرایک سے دو گھنٹے بعد دہرائیں تاہم برف کو براہ راست جلد پر لگانے سے گریز کریں۔
ڈاکٹر سے کب رابطہ کریں
٭10 منٹ دباؤ ڈالنے کے بعد بھی خون نہ رکے۔
٭آنکھ پر یا اس کے بہت قریب کٹ لگ جائے۔
٭زخم آدھے انچ سے زیادہ لمبا اورگہرا ہو۔
٭زنگ یا کسی اورشےسے آلودہ چیز زخم کا سبب بنے۔
٭متاثرہ حصہ زیادہ گرم ہو،اس پر سوزش اورسوجن بھی ظاہر ہونے لگے۔
٭کسی جانورنے کاٹا ہو۔
بچاؤ کے طریقے
٭آنکھ، کان اورناک کے قریب کوئی تیزدھاریا نوکیلی چیز لے کر مت جائیں۔
٭منہ میں ایسی کوئی چیز رکھ کر بھاگنے سے بھی گریزکریں۔
٭اپنے چہرے کو کسی جانور کےچہرے یا منہ کے زیادہ قریب نہ کریں۔
٭کھیلتے ہوئے حفاظتی گارڈز ضرور پہنیں۔
facial injuries, first aid, facial injury prevention
