ماحول کا ٹمپریچر کم ہونے سے ہسپتال سے باہر دل کی دھڑکن اچانک بند ہونے کے واقعات بڑھ سکتے ہیں۔ یہ واقعات گھر یا کسی دوسری جگہ ہوسکتے ہیں۔ اس کیفیت کو کارڈیک اریسٹ کہا جاتا ہے۔ ہنگری میں ہونے والی ایک تحقیق میں درجہ حرارت میں کمی کے ساتھ ایسے واقعات میں اضافہ دیکھا گیا۔
سائنسی جریدے پبلک ہیلتھ میں شائع تحقیق میں نومبر 2018 سے دسمبر 2023 تک کارڈیک اریسٹ کے 114,830 واقعات کا جائزہ لیا گیا۔
نتائج کے مطابق اوسط درجہ حرارت میں ہر ایک ڈگری کمی کے ساتھ کارڈیک اریسٹ کے واقعات میں 1.4 فیصد اضافہ دیکھا گیا۔ سردیوں میں یہ واقعات گرمیوں کے مقابلے میں 17.8 فیصد زیادہ تھے۔
محققین نے درجہ حرارت کے ساتھ ہوا کی رفتار، فضائی دباؤ، نمی اور ہوا کے معیار کا بھی جائزہ لیا۔ ان کے مطابق ایک دن میں درجہ حرارت 5 ڈگری سے زیادہ گرنے پر کارڈیک اریسٹ کے واقعات بڑھ سکتے ہیں۔
ریسرچرز کے مطابق موسمی معلومات زیادہ خطرے والے دنوں کی نشاندہی میں مدد دے سکتی ہیں۔ اس سے ایمرجنسی سروسز کو پیشگی تیاری میں بھی مدد مل سکتی ہے۔
