مردوں میں جانگھ کا درد

جانگھ کا درد (groin pain) جسم کے اس حصے کا درد ہے جہاں ران کا اندرونی حصہ اور پیٹ آپس میں ملتے ہیں۔ بالعموم یہ پریشانی کا باعث نہیں بنتا، تاہم بسا اوقات کسی سنگین بیماری کی طرف اشارہ بھی ہو سکتا ہے۔

وجوہات

جانگھ میں درد کی سب سے عام وجہ پٹھوں، ٹنڈن یا لیگامنٹ میں کھچاؤ ہے۔ یہ زیادہ تر ہاکی، فٹ بال اور ساکر کھیلنے والے کھلاڑیوں میں ہوتا ہے۔ درد چوٹ کے فوراً بعد شروع ہو سکتا ہے یا آہستہ آہستہ ہفتوں یا مہینوں میں بڑھتا ہے۔ چوٹ والے حصے کا مسلسل استعمال درد کو مزید بڑھا دیتا ہے۔

ہڈی کی چوٹ یا فریکچر بھی درد کا سبب بن سکتا ہے، تاہم یہ کم ہوتا ہے۔ ہرنیا یا گردے کی پتھری بھی جانگھ میں درد پیدا کر سکتی ہیں۔ خصیوں کا درد الگ ہوتا ہے، لیکن بعض اوقات یہ جانگھ تک بھی پھیل جاتا ہے۔

جانگھ کے درد کی کئی براہِ راست اور بالواسطہ وجوہات ہیں، جن میں اہم درج ذیل ہیں:

پٹھوں یا ٹنڈن سے متعلق بیماریاں

٭ پٹھوں کا کھچاؤ، یعنی پٹھے یا ٹنڈن کی چوٹ

٭ پیریفارمس سنڈروم (Piriformis Syndrome)، جس میں کولہے کے اندرونی پٹھے متاثر ہوتے ہیں

٭ کھیل یا زیادہ حرکت سے وہ ریشے کھچ جانا جو پٹھوں کو ہڈی سے جوڑتے ہیں

٭ ٹنڈن کی سوزش

ہڈیوں یا جوڑوں سے متعلق بیماریاں

٭ ایواسکولر نیکروسس (Avascular Necrosis)، جس میں ہڈی کو خون کی فراہمی کم ہو جاتی ہے

٭ ایولوژن فریکچر (Avulsion Fracture)، جس میں ہڈی کا چھوٹا ٹکڑا الگ ہو جاتا ہے

٭ برسا کی سوزش (Bursitis)، برسا جسم میں ہڈی اور پٹھوں کے درمیان رگڑ کم کرنے والی چھوٹی تھیلی ہے۔

٭ اوسٹیو آرتھرائٹس

٭ سٹریس فریکچر (Stress Fracture)، ہڈی میں چھوٹی یا بار بار کی چوٹ کے باعث ہونے والا چھوٹا یا Hairline فریکچر

سکروٹم سے متعلق بیماریاں

٭ سکروٹم وہ تھیلی ہے جس میں خصیے ہوتے ہیں۔ اس کی بعض بیماریاں درد کا سبب بنتی ہیں:

ہائیڈروسیل (Hydrocele): سکروٹم میں پانی بھر جانے کی حالت، جس سے تھیلی سوج جاتی ہے

سکروٹل رسولیاں (Scrotal Masses): گلٹیاں، جو سرطانی یا غیر سرطانی ہو سکتی ہیں

ویریکوسیل (Varicocele): سکروٹم کی رگوں کا پھیل جانا، جو خون کے بہاؤ میں خلل پیدا کر سکتا ہے

خصیوں سے متعلق بیماریاں

ایپیڈیڈیمائٹس (Epididymitis): خصیے کے پیچھے نالی کی سوزش

آرکائٹس (Orchitis): ایک یا دونوں خصیوں کی سوزش

سپرمٹو سیل (Spermatocele): خصیے کے قریب پانی یا سیال سے بھری تھیلی

ٹیسٹیکولر ٹورشن (Testicular Torsion): ایک ایمرجنسی حالت جس میں خصیہ اپنی نالی کے گرد مڑ جاتا ہے

خصیوں کا کینسر (Testicular Cancer): خصیوں میں پیدا ہونے والا کینسر، جو عموماً گلٹی، سوجن یا درد کی صورت میں ظاہر ہوتا ہے

دیگر طبی وجوہات

انگوئنل ہرنیا (Inguinal Hernia): پیٹ کا ٹشو کمزور جگہ سے باہر نکلنا

٭ گردے کی پتھری، جو نمک اور معدنیات سے بنتی ہے

٭ ممپس، وائرس سے ہونے والی بیماری

٭ دبی ہوئی نرو

٭ پروسٹیٹائٹس، پروسٹیٹ غدود کی سوزش

٭ شیاٹیکا، کمر سے ٹانگ تک پھیلنے والا اعصابی درد

٭ سوجے ہوئے لمف نوڈز، جو انفیکشن سے لڑتے ہیں

٭ پیشاب کی نالی کا انفیکشن

ڈاکٹر سے کب رجوع کریں؟

فوری طبی امداد کی ضرورت

٭ جانگھ کے درد کے ساتھ کمر، پیٹ یا سینے میں بھی درد ہو

٭ خصیوں میں اچانک شدید درد یا سوجن

٭ پیشاب میں خون آئے یا وزن تیزی سے کم ہو رہا ہو

٭ خصیوں میں سوجن کے ساتھ بخار یا متلی بھی ہو

ڈاکٹر سے عمومی ملاقات

٭ جانگھ میں شدید درد ہو

٭ گھریلو علاج سے چند دنوں میں افاقہ نہ ہو

٭ خصیوں میں ہلکا درد کئی دن برقرار رہے

٭ خصیے کے اندر یا اردگرد گلٹی محسوس ہو

٭ درد پیٹ سے جانگھ اور خصیے تک پھیل جائے

سیلف کیئر ٹپس

اگر جانگھ میں درد کھچاؤ یا ہلکی چوٹ کی وجہ سے ہو تو یہ اقدامات مددگار ہیں:

٭ درد کم کرنے والی دوا استعمال کریں

٭ دن میں 3 سے 4 بار تقریباً 10 منٹ کے لیے آئس پیک لگائیں

٭ کھیل یا سخت جسمانی سرگرمی سے عارضی وقفہ لیں

٭ آرام کریں

نوٹ: یہ مضمون قارئین کی معلومات کے لیے شائع کیا گیا ہے۔ صحت سے متعلق امور میں اپنے معالج کے مشورے پر عمل کریں۔