بعض افراد سونے کے کچھ گھنٹوں بعد بستر سے اٹھتے ہیں اور نیند میں ہی مگر کھلی آنکھوں کے ساتھ چلنے یا دیگر سرگرمیاں کرنے لگتے ہیں۔ وہ اس کیفیت میں دوسروں کی کسی بات پر رد عمل ظاہر نہیں کرتے۔ ایسے میں انہیں دیکھنے والے بعض افراد اسے بھوت پریت کا اثر سمجھ کر ڈر جاتے ہیں۔ نیند میں چلنا درحقیقت یہ ایک طبی کیفیت ہے۔ اس کے شکار افراد کو بیدار ہونے پر رات کو پیش آنے والا کوئی واقعہ یاد نہیں ہوتا۔
موروثیت، نیند کی کمی، شدید تھکاوٹ، مخصوص ادویات مثلاً نیند کی گولیوں کا اثر، نیند میں خلل، ذہنی تناؤ، بے چینی، سر پر چوٹ اور سونے کی جگہ تبدیل ہونا اس کی کچھ وجوہات ہیں۔ نیند میں چلنا ایسا مسئلہ ہے جو کسی کو بھی ہو سکتا ہے۔ تاہم یہ بڑوں کی نسبت بچوں میں زیادہ عام ہے۔ اس سلسلے میں کچھ ہدایات فائدہ مند ثابت ہو سکتی ہیں۔
کرنے کے کام
بعض مائیں چھوٹے بچوں کے بازو پر ایک دھاگہ باندھ کر اس کا دوسرا کونا اپنے بازو سے باندھ دیتی ہیں۔ اس سے انہیں بچے کی حرکت کا علم ہو جاتا ہے۔ یہ کافی حد تک فائدہ مند ہے۔ کسی چیز سے ٹکرانے، گرنے اور چوٹ سے بچانے کے لیے ان باتوں پر عمل کریں:
٭ سونے سے پہلے تمام کھڑکیاں اور دروازے بند کر دیں۔
٭ دروازوں پر الارم یا کوئی گھنٹی لگائیں۔ جیسے ہی کوئی انہیں کھولے گا تو سب کو معلوم ہو جائے گا۔
٭ ممکن ہو تو ان افراد کو گھر کے نچلے پورشن میں سلائیں تاکہ سیڑھیوں سے گرنے کا خطرہ نہ ہو۔
٭ سیڑھیوں پرچڑھنے اور اترنے والے راستوں کو دروازے، چارپائی یا کسی بھاری چیز سے بند کر دیں۔
٭ راستے سے ایکسٹینشن بورڈ، گیس پائپ، بجلی کی تاریں اور نوکیلی اشیاء ہٹا دیں۔
٭پرسکون نیند کے لیے ایک روٹین بنائیں۔ اس میں کچھ سرگرمیاں شامل کریں۔ مثلاً کتاب پڑھنا یا گرم پانی سے نہانا وغیرہ۔
٭ کسی کو نیند میں چلتا پائیں تو جگانے کی کوشش نہ کریں بلکہ نرمی سے پکڑ کر واپس بستر کی جانب لے جائیں۔
