اوسٹیوپوروسس میں ہڈیاں اتنی کمزور اور بھربھری ہوجاتی ہیں کہ معمولی سی چوٹ پر بھی ٹوٹ سکتی ہے۔ اس مرض میں ہڈیوں کا بیرونی ڈھانچہ اسی طرح رہتا ہے لیکن وہ اندر سے کھوکھلی ہوجاتی ہیں۔ پاکستان کا شمار ان ممالک میں ہوتا ہے جہاں اس مرض کا تناسب بہت زیادہ ہے۔ یہ مردوں کی نسبت خواتین میں زیادہ عام ہے۔ اس میں ریڑھ اور کولہے کی ہڈی سب سے زیادہ متاثر ہوتی ہیں۔

مرض کی وجوہات

٭کیلشیم اور وٹامن ڈی کی کمی۔

٭ایسٹروجن یا اینڈروجن ہارمون کی کمی۔

٭تھائی رائیڈ کے مسائل۔

٭پٹھوں کو کم استعمال کرنا۔

٭ہڈیوں کا کینسر۔

٭ جینیاتی خرابی یا مخصوص ادویات کا زیادہ استعمال۔

٭دودھ یا مچھلی نہ کھانا۔ ان میں ہڈیوں کے لئے مفید غذائی اجزاء ہوتے ہیں۔

علامات کیا ہیں

ہڈیوں میں شدید تکلیف, گردن میں درد,ذرا سی چوٹ پر بہت زیادہ تکلیف ہونا, تھوڑی سی جسمانی مشقت پر جسم میں دیر تک درد ہونا اور معمولی سا بوجھ بھی برداشت نہ کر پانا ہڈیوں کے بھر بھرے پن کی کچھ علامات ہیں۔

بچاؤ کی تدابیر

اس مسئلے کی کچھ وجوہات (مثلاً جنس اور عمر میں اضافہ) ہمارے کنٹرول میں نہیں تاہم کچھ ہمارے بس میں بھی ہیں۔ ان پر قابو رکھ کر اس مرض کے امکانات کم کئے جا سکتے ہیں۔ تدابیر یہ ہیں:

٭18 سال کی عمر کے بعد وقتاً فوقتاً ہڈیوں میں معدنیات کی سطح جاننے کے لئے بی ایم ڈی (Bone Mineral Density) ٹیسٹ کرواتے رہیں تاکہ کسی ممکنہ مسئلے کا علم ہوسکے۔

٭قدرتی ذرائع مثلاًدودھ، پھلوں اور سی فوڈز سے کیلشیم کی کمی کو پورا کرنے کی کوشش کریں۔ ڈاکٹر کے مشورے سے سپلیمنٹ بھی لئے جاسکتے ہیں۔

٭کیلشیم کی کمی سے بچنے کے لئے کولا ڈرنکس‘ انرجی ڈرنکس اور ڈبہ بند جوسز کے زیادہ استعمال سے بچیں۔ ان کے بجائے لیموں پانی یا سبز چائے وغیرہ کو ترجیح دیں۔

٭سگریٹ نوشی اور دیگر نشہ آور اشیاء سے پرہیز کریں۔

٭روزانہ کم از کم آدھا گھنٹہ ورزش کریں۔

٭وٹامن ڈی کی کمی سے بچنے کے لئے صبح کے وقت 10سے 15 منٹ دھوپ میں بیٹھیں۔

٭بچوں کو شروع سے ہی دودھ پینے کی عادت ڈالیں تاکہ ان میں کیلشیم کی کمی نہ ہونے پائے۔

مریض کیا کریں

٭زمین سے کچھ اٹھانا ہو تو اپنی کمر کو سیدھا رکھتے ہوئے گھٹنوں کے بل بیٹھیں اور پھر وزن اٹھائیں۔

٭اچانک اور تیزی سے کروٹ نہ بدلیں۔ بستر سے اٹھتے وقت بھی احتیاط کریں۔

٭زیادہ وزنی سامان اٹھانے سے گریز کریں۔

٭گرنے یا پھسلنے کا باعث بننے والے عوامل کا خیال رکھیں۔

٭ چلنے پھرنے کے راستے سے تمام رکاوٹوں کو دور کردیں تاکہ کسی چیز سے ٹکرا کر گرنے کا خدشہ نہ ہو۔

Osteoporosis – Symptoms and Causes, What You Can Do Now to Prevent Osteoporosis, How to Prevent Osteoporosis, hadiyon ko kamzor honay say kaisay bachaein