کچن گیجٹ
گارلک پریس
بازار میں ملنے والی گارلک سوس وہ مزہ اور خوشبو نہیں دے سکتی جو تازہ لہسن کوٹنے سے حاصل ہوتی ہے۔ لہسن کا استعمال صحت کے لئے بہت فائدہ مند ہے۔ کم ہی کھانے ایسے ہوں گے جن میں اس کا استعمال نہ ہوتا ہو۔ ہر ڈش کے لئے روز روز سِل بٹے پر اسے کوٹنا بوریت والاکام ہے۔اس کے باعث کبھی تو لہسن ڈالا ہی نہیں جاتا اور کبھی ثابت ڈال دیا جاتا ہے ۔ اس سے ڈِش کا ذائقہ متاثر ہوتا ہے۔
اس مسئلے کے حل کے لئے مارکیٹ میں ’’گارلک پریس‘‘ نامی ایک آلہ ملتا ہے۔ سٹین لیس سٹیل سے بنا یہ خوبصورت پلاس نما آلہ تین حصوں یعنی کراس کی شکل میں لگائی گئی دو ہموار اور ملائم سی سلاخوں اور ایک چھوٹی سی ڈبیہ پر مشتمل ہوتا ہے جس میں لہسن کا جوا ڈالا جاتا ہے۔ یہ سلاخیں دیکھنے میں پلاس جیسی لگتی ہیں‘تاہم پلاس کے برعکس انہیں 360ڈگری پر گھمایا جا سکتا ہے۔ ہم انہیں ہینڈل کہہ سکتے ہیں۔ اس میں لہسن پیستے ہوئے اسے چھیلنے کی ضرورت نہیں پڑتی اور پسنے پر یہ پیسٹ جیسا ملائم لگتا ہے۔
پیسنے کے لئے ڈبیہ میں لہسن رکھ کر دونوں ہاتھوں کی مدد سے دونوں ہینڈلز کو ایک دوسرے کے قریب لایا جاتا ہے۔ ایسا کرنے سے دباؤ پڑنے پر ڈبیہ میں سے پسا ہوا لہسن نیچے گر جاتا ہے۔ اس کے بعد ڈبیہ میں سے چھلکا نکال کر سلاخوں کو 360ڈگری پر گھما کرڈیباکو الگ کر کے دھو لیا جاتا ہے۔
Garlic press, kitchen, gadgets
