پتہ، جگر کے نیچے دائیں جانب موجود ایک ناشپاتی نما عضو ہے جو بائل کو جمع کرتا ہے۔ بائل ہاضمے میں مدد دینے والا مائع ہے جو جگر میں بنتا ہے اور پتے میں جمع ہوتا ہے۔ کولیسسٹیکٹومی (Cholecystectomy) ایک سرجری ہے جس میں پتہ جسم سے نکال دیا جاتا ہے۔ پتہ نکالنے (Gallbladder removal) کے عمل میں چھوٹے کٹس کے ذریعے کیمرا اور آلات داخل کر کے پتہ نکالا جاتا ہے جسے لیپروسکوپک طریقہ کہتے ہیں۔ بعض صورتوں میں بڑا کٹ لگایا جاتا ہے جسے اوپن طریقہ کہا جاتا ہے۔ یہ ایک عام اور نسبتاً محفوظ آپریشن ہے جس میں پیچیدگیوں کا خطرہ کم ہوتا ہے۔ زیادہ تر مریض اسی دن گھر جا سکتے ہیں۔
کیوں کیا جاتا ہے
یہ سرجری زیادہ تر پتے کی پتھری اور اس سے پیدا ہونے والی پیچیدگیوں کے علاج کے لیے کی جاتی ہے۔ ڈاکٹر درج ذیل صورتوں میں یہ آپریشن تجویز کرتے ہیں:
٭ پتے کی پتھری، جو علامات پیدا کرے
٭ بائل ڈکٹ میں پتھری
٭ پتے کی سوزش
٭ بڑے پولپس جو کینسر میں تبدیل ہو سکتے ہیں
٭ پتھری سے لبلبے کی سوزش
٭ پتے کے کینسر کا شبہ
خطرات
اس سرجری میں خطرات کم ہوتے ہیں لیکن بعض پیچیدگیاں ہو سکتی ہیں۔ ان میں بائل کا رسنا، خون بہنا، انفیکشن، قریبی اعضاء کو نقصان اور جنرل اینستھیزیا سے متعلق مسائل جیسے خون کے لوتھڑے یا نمونیا شامل ہیں۔ یہ خطرات مریض کی مجموعی صحت اور بیماری کی نوعیت پر منحصر ہوتے ہیں۔
تیاری
کھانا اور ادویات
سرجری سے پہلے مریض کو ہدایت دی جاتی ہے کہ رات سے کھانا بند کر دے۔ کم از کم چار گھنٹے پہلے کھانا پینا مکمل بند کیا جاتا ہے۔ کچھ ادویات یا سپلیمنٹس عارضی طور پر روک دیے جاتے ہیں کیونکہ وہ خون بہنے کا خطرہ بڑھا سکتے ہیں۔ ، پانی کے ساتھ کچھ دوائیں لی جا سکتی ہیں۔
ذاتی تیاری
زیادہ تر مریض اسی دن گھر چلے جاتے ہیں، تاہم بعض اوقات ہسپتال میں قیام کی ضرورت پڑ سکتی ہے۔ اس لیے ضروری اشیاء مثلاً کپڑے، برش اور ذاتی سامان ساتھ رکھنا بہتر ہوتا ہے۔
احتیاطی تدابیر
گھر واپسی کے لیے کسی کو ساتھ لانا ضروری ہے۔ پہلی رات کسی قابل اعتماد شخص کا ساتھ رہنا بہتر ہوتا ہے۔
آپریشن سے پہلے
یہ عمل جنرل اینستھیزیا کے تحت کیا جاتا ہے جس میں مریض مکمل طور پر بے ہوش ہوتا ہے۔ دوائیں رگ کے ذریعے دی جاتی ہیں۔ سانس کے لیے ٹیوب ڈالی جاتی ہے اور پھر سرجری شروع کی جاتی ہے۔
آپریشن کے دوران
لیپروسکوپک طریقہ
اس میں پیٹ میں چھوٹے کٹ لگائے جاتے ہیں۔ ایک کٹ سے کیمرا داخل کیا جاتا ہے، اور سرجن سکرین پر دیکھ کر آلات کے ذریعے پتہ نکالتا ہے۔ یہ پروسیجر عام طور پر ایک سے دو گھنٹے لیتا ہے۔ بعض اوقات کسی پیچیدگی کی صورت میں طریقہ اوپن سرجری میں تبدیل کیا جا سکتا ہے۔
اوپن طریقہ
اس میں دائیں جانب پسلیوں کے نیچے بڑا کٹ لگایا جاتا ہے۔ پٹھوں اور ٹشوز کو ہٹا کر پتہ نکالا جاتا ہے، اور پھر کٹ بند کر دیا جاتا ہے۔ یہ عمل بھی ایک سے دو گھنٹے میں مکمل ہو جاتا ہے۔
آپریشن کے بعد
مریض کو ریکوری میں رکھا جاتا ہے اور حالت بہتر ہونے پر وارڈ میں منتقل کیا جاتا ہے۔ لیپروسکوپک سرجری میں اکثر اسی دن گھر واپسی ممکن ہوتی ہے یا ایک رات قیام درکار ہوتا ہے۔ مکمل صحت یابی تقریباً ایک ہفتے میں ہو جاتی ہے۔ اوپن سرجری میں دو سے تین دن ہسپتال میں رہنا پڑتا ہے، اور مکمل صحت یابی میں چار سے چھ ہفتے لگ سکتے ہیں۔
نتائج
یہ سرجری پتے کی پتھری سے ہونے والا درد ختم کرتی ہے اور زیادہ تر مریضوں میں پتھری دوبارہ نہیں بنتی۔ عام طور پر ہاضمہ معمول کے مطابق رہتا ہے تاہم کچھ افراد میں عارضی طور پر نرم یا ڈھیلا پاخانہ آ سکتا ہے جو وقت کے ساتھ بہتر ہو جاتا ہے۔ معمول کی سرگرمیوں میں واپسی سرجری کے طریقے اور صحت کی حالت پر منحصر ہوتی ہے۔ لیپروسکوپک پروسیجر میں واپسی جلد ہوتی ہے، جبکہ اوپن سرجری میں زیادہ وقت لگتا ہے۔
نوٹ: یہ مضمون صرف قارئین کی معلومات کے لیے شائع کیا گیا ہے۔ صحت سے متعلق امور میں ہمیشہ اپنے معالج کے مشورے پر عمل کریں۔
