بخار میں جھٹکے (Febrile Seizure) لگنے کا بنیادی سبب بخار ہی ہوتا ہے، جو عموماً کسی انفیکشن کی وجہ سے ہوتا ہے۔ جھٹکے ایسے صحت مند بچوں میں بھی دیکھے جاتے ہیں جن کی نشوونما معمول کے مطابق ہو، اور جنہیں پہلے کبھی اعصابی مسائل نہ رہے ہوں۔
بخار میں جھٹکے لگنا بظاہر دیکھنے میں خوفناک لگ سکتا ہے، تاہم زیادہ تر دورے چند منٹ میں رک جاتے ہیں۔ یہ کسی سنگین بیماری کی علامت نہیں ہوتے۔ اس کے باوجود دورے کے فوراً بعد ڈاکٹر سے رجوع کرنا ضروری ہوتا ہے۔
علامات
بخار کے دوران دورے والے بچوں میں درج ذیل علامات دیکھنے کو مل سکتی ہیں:
٭ پورے جسم کا جھٹکوں سے لرزنا
٭ ہوش کھو دینا
٭ بازو یا ٹانگوں کا اچانک جھٹکنا یا ان میں اکڑاؤ ہونا
٭ بخار 100.4°F (38°C) سے زیادہ ہونا
اقسام
سادہ دورے (Simple Febrile Seizures)
یہ بخار میں دوروں کی سب سے عام قسم ہے جو چند سیکنڈ سے 15 منٹ تک رہتی ہے۔ یہ ایک دن میں دوبارہ نہیں ہوتے اور پورے جسم میں ہو سکتے ہیں۔
پیچیدہ دورے (Complex Febrile Seizures)
یہ دورے 15 منٹ سے زیادہ رہ سکتے ہیں، ایک دن میں ایک سے زیادہ بار ہو سکتے ہیں، یا بچے کے جسم کے ایک طرف محدود ہو سکتے ہیں۔
زیادہ تر دورے بخار شروع ہونے کے 24 گھنٹے کے اندر آتے ہیں اور اکثر بیماری کی پہلی علامت ہوتے ہیں۔
وجوہات
بخار میں جھٹکے زیادہ تر جسمانی ٹمپریچر میں اضافے کی وجہ سے ہوتے ہیں۔ حتیٰ کہ ہلکا بخار بھی دورے کا سبب بن سکتا ہے۔
انفیکشن
بخار میں جھٹکوں کا زیادہ تر تعلق وائرل انفیکشن سے ہوتا ہے۔ بیکٹیریل انفیکشن کی وجہ سے جھٹکے کم دیکھنے میں آتے ہیں۔
انجیکشن کے بعد دورے
کچھ ویکسینز لگنے کے بعد بچے کو ہلکا بخار ہو سکتا ہے، جو جھٹکوں کا سبب بھ بن سکتا ہے۔ ویکسین خود دورے کا سبب نہیں بنتی۔ اس قسم کی ویکسینز میں ڈپتھیریا، ٹیٹنس، پرٹوسیس اور ایم ایم آر شامل ہیں۔
خطرے کے عوامل
بخار میں جھٹکوں کے امکانات بڑھانے والے عوامل یہ ہیں:
کم عمر: زیادہ تر دورے 6 ماہ سے 5 سال کے بچوں میں ہوتے ہیں، خاص طور پر 12 سے 18 ماہ کی عمر میں۔
فیملی ہسٹری: بعض بچوں میں کچھ جینز اس سے منسلک پائے گئے ہیں۔
ڈاکٹر سے کب رابطہ کریں؟
بخار کے پہلے دورے کے فوراً بعد ڈاکٹر سے رابطہ کریں، چاہے دورہ چند سیکنڈ کا ہی کیوں نہ ہو۔ اگر دورہ پانچ منٹ سے زیادہ رہے یا درج ذیل علامات کے ساتھ ہو تو فوری طور پر ایمبولینس بلائیں:
٭ قے
٭ گردن اکڑ جانا
٭ سانس لینے میں دشواری
٭ بہت زیادہ نیند آنا
پیچیدگیاں
بخار میں زیادہ تر جھٹکے مستقل اثرات مرتب نہیں کرتے۔ سادہ دورے دماغی نقصان، ذہنی معذوری یا سیکھنے کے مسائل پیدا نہیں کرتے اور یہ مرگی کی علامت بھی نہیں ہوتے۔ بار بار دورے سب سے عام پیچیدگی ہے۔ دوبارہ ہونے کا خطرہ زیادہ ہوتا ہے اگر:
٭ پہلا دورہ ہلکے بخار کی وجہ سے ہوا ہو
٭ دورہ بیماری کی پہلی علامت ہو
٭ فیملی میں کسی کو بخار میں جھٹکوں کی تاریخ ہو
٭ بچے کی عمر پہلے دورے کے وقت 18 ماہ سے کم ہو
تشخیص
ڈاکٹر بچے کی میڈیکل اور نشوونما کی ہسٹری دیکھتے ہیں۔
سادہ دورے: صحیح ویکسین والے بچوں میں ٹیسٹ کی ضرورت نہیں۔
پیچیدہ دورے: ای ای جی یا ایم آر آئی تجویز کی جا سکتی ہے تاکہ دماغ کی سرگرمی اور ممکنہ مسائل معلوم کیے جا سکیں۔
علاج
زیادہ تر دورے خود بخود چند منٹ میں رک جاتے ہیں۔ اگر بچے کو دورہ ہو تو:
٭ بچے کو نرم، ہموار سطح پر ایک طرف رکھیں
٭ دورے کا وقت نوٹ کریں
٭ بچے کے قریب رہیں اور سکون دیں
٭ پاس سے سخت یا نوکیلی اشیاء ہٹا دیں
٭ تنگ کپڑے کھولیں
٭ بچے کو روکنے یا منہ میں کچھ ڈالنے سے گریز کریں
ہنگامی صورت حال
٭ دورہ پانچ منٹ سے زیادہ ہو
٭ دورے بار بار آئیں
٭ دورہ پانچ منٹ سے کم ہو لیکن بچہ جلد بہتر نہ ہو
ڈاکٹر طویل دورے یا سنگین علامات کی صورت میں ادویات دے سکتے ہیں یا بچے کو ہسپتال میں رکھ سکتے ہیں، لیکن سادہ دورے کے لیے ہسپتال کی ضرورت عام طور پر نہیں ہوتی۔
احتیاطی تدابیر
٭ زیادہ تر دورے بخار کے شروع ہونے کے پہلے چند گھنٹوں میں ہوتے ہیں
٭ ادویات بچے کو آرام دے سکتی ہیں، لیکن دورے کو روک نہیں سکتیں
٭ ایسپرین بچوں یا نوعمروں کو احتیاط سے دیں، خاص طور پر وریس یا فلو جیسی بیماری کے بعد، کیونکہ یہ رے کی بیماری (Reye’s syndrome) پیدا کر سکتی ہے
٭ اگر دورے لمبے ہوں تو بعض اوقات ڈاکٹر ناک یا مقعد کے ذریعے دی جانے والی دورہ روکنے والی ادویات تجویز کر سکتے ہیں
نوٹ: یہ مضمون صرف معلومات کے لیے شائع کیا گیا ہے۔ صحت کے کسی بھی مسئلے میں ہمیشہ اپنے معالج سے رجوع کریں۔
