ناک بہنا

ناک بہنا (Runny nose) ایک ایسی حالت ہے جس میں ناک سے مائع رطوبت خارج ہوتی ہے۔ یہ رطوبت ہلکی اور شفاف بھی ہو سکتی ہے اور گاڑھی زرد یا سبز بھی۔ یہ ناک سے براہ راست خارج ہو سکتی ہے یا گلے کے پچھلے حصے میں بہہ سکتی ہے، اور بعض اوقات دونوں صورتیں ایک ساتھ بھی ہوتی ہیں۔ گلے میں بہنے والی اس کیفیت کو پوسٹ نزل ڈرپ کہا جاتا ہے۔

ناک بہنے کو عام طور پر رائنوریا یا رائینائٹس کہا جاتا ہے، تاہم دونوں اصطلاحات میں واضح فرق ہے۔ رائنوریا میں زیادہ تر پتلی اور شفاف رطوبت خارج ہوتی ہے، جبکہ رائینائٹس ناک کے اندر سوزش کی کیفیت کو ظاہر کرتا ہے۔ زیادہ تر صورتوں میں ناک بہنے کی بنیادی وجہ رائینائٹس ہی ہوتی ہے، اور اس کے ساتھ ناک بند ہونے کی شکایت بھی ہو سکتی ہے۔

اسباب

ناک کے اندر کسی بھی قسم کی تحریک ناک بہنے کا سبب بن سکتی ہے۔ انفیکشنز، الرجی اور مختلف طبی حالتیں اس کی عام وجوہات میں شامل ہیں۔ بعض افراد میں بغیر کسی واضح وجہ کے بھی ناک مسلسل بہتی رہتی ہے، جسے نان الرجک رائینائٹس کہا جاتا ہے۔

اگر ناک کے ایک حصے سے مسلسل رطوبت خارج ہو تو اس کی وجہ پولپ، ناک میں کوئی بیرونی چیز یا رسولی ہو سکتی ہے۔ بعض اوقات شدید مائیگرین جیسا سر درد بھی ناک بہنے کا باعث بنتا ہے۔

ناک بہنے کی عام وجوہات درج ذیل ہیں:

٭ شدید سائنوسائٹس

٭ الرجی

٭ طویل مدتی سائنوسائٹس

٭ عام نزلہ

٭ ناک کھولنے والے سپرے کا زیادہ استعمال

٭ ناک کی ہڈی کا ٹیڑھا پن

٭ خشک یا ٹھنڈی ہوا

٭ خون کی نالیوں میں سوزش کی بیماری

٭ ہارمونی تبدیلیاں

٭ فلو

٭ ناک میں بیرونی چیز جانا

٭ بعض ادویات کا استعمال

٭ ناک کے پولپس

٭ نان الرجک رائینائٹس

٭ حمل

٭ آر ایس وی وائرس

٭ تمباکو کا دھواں

ڈاکٹر سے کب رابطہ کریں

اگر علامات طویل عرصے تک برقرار رہیں تو طبی مشورہ ضروری ہے۔ ماہرین صحت کے مطابق درج ذیل صورتوں میں فوری رابطہ کریں:

٭ علامات 10 دن سے زیادہ برقرار رہیں

٭ اس کے ساتھ تیز بخار ہو

٭ ناک سے پیلی یا سبز رطوبت آئے اور ساتھ چہرے میں درد یا بخار ہو

٭ ناک سے خون آ رہا ہو یا سر کی چوٹ کے بعد مسلسل بہاؤ جاری رہے

بچوں کے معاملے میں خصوصی توجہ ضروری ہے:

٭ بچہ دو ماہ سے کم عمر ہو اور بخار ہو

٭ ناک بند ہونے یا ناک بہنے کی وجہ سے دودھ پینے یا سانس لینے میں مشکل ہو

سیلف کیئر

ڈاکٹر سے رجوع سے قبل چند سادہ اقدامات علامات میں کمی لا سکتے ہیں:

٭ الرجی پیدا کرنے والی چیزوں سے مکمل پرہیز کریں

٭ اگر اس کے ساتھ چھینکیں آئیں اور آنکھوں میں خارش ہو تو بغیر نسخے کی الرجی کی دوا معالج کی ہدایت کے مطابق استعمال کریں

٭ بچوں کے لیے سیلائن ڈراپس استعمال کریں

پوسٹ نزل ڈرپ میں آرام کیلئے

٭ دھوئیں اور اچانک نمی کی تبدیلی سے بچیں

٭ زیادہ پانی پئیں

٭ نمکین ناک اسپرے یا ناک واش استعمال کریں

نوٹ: یہ مضمون صرف قارئین کی معلومات کے لیے شائع کیا گیا ہے۔ صحت سے متعلق امور میں ہمیشہ اپنے معالج کے مشورے پر عمل کریں۔