اطلاعات کے مطابق راولپنڈی میں سپر فلو کے چند کیسز سامنے آئے ہیں۔ ڈسٹرکٹ ہیلتھ اتھارٹی راولپنڈی کے مطابق صورت حال پر مسلسل نظر رکھی جا رہی ہے۔ محکمہ صحت کے مطابق صورتحال مکمل کنٹرول میں ہے۔
فلو کی یہ قسم انفلوئنزا اے (H3) سے پھیلتی ہے، اور عام طور پر سپر فلو کہلاتی ہے۔ دسمبر میں 22 مشتبہ کیسز کی اسکریننگ کی گئی، جن میں سے صرف چار کیسز کی تصدیق ہوئی۔ تمام مریض علاج کے بعد مکمل صحت یاب ہو چکے ہیں۔ تصدیق شدہ کیسز میں تین راولپنڈی شہر کے علاقے سیٹلائٹ ٹاؤن، یونین کونسل 39 اور ریلوے کالونی سے رپورٹ ہوئے جبکہ ایک کیس مری سے تعلق رکھتا ہے۔
ریپڈ رسپانس پروٹوکول کے تحت 18 قریبی افراد کی شناخت کی گئی۔ ان میں سے صرف ایک ثانوی کیس مثبت آیا۔ متاثرہ علاقوں میں فعال نگرانی جاری ہے۔ ڈسٹرکٹ ہیلتھ اتھارٹی کے مطابق راولپنڈی میں سپر فلو سے خوفزدہ ہونے کی ضرورت نہیں۔ تاہم احتیاطی تدابیر اختیار کرنا ضروری ہے۔
