آنکھوں کے گرد سیاہ حلقے اور سوجن ایک عام مسئلہ ہے جس کے لئے بالعموم باقاعدہ علاج کی ضرورت نہیں ہوتی۔ بعض افراد میں یہ مسئلہ جینیاتی ہوتا ہے جبکہ کچھ میں اس کی وجہ الرجی، ایگزیما، مسلسل تھکاوٹ، نیند کی کمی، ذہنی تناؤ، انیمیا، تمباکونوشی، سورج کی شعاعیں یا بڑھتی عمرکے اثرات وغیرہ بھی ہوسکتے ہیں۔

حلقوں اور سوجن کی صورت میں کئی مصنوعات کے فائدہ بخش ہونے کا دعویٰ کیا جاتا ہے تاہم دیرپا اور مؤثر حل اس کی وجہ تلاش کرنا اور اس کے مطابق حکمت عملی اختیار کرنا ہے۔

حلقے اور سوجن کے لئے مفید ٹِپس

یہ مسائل ہوں تو ڈاکٹر کے مشورے سے خون کے ٹیسٹ ضرور کروائیں تاکہ ان کی وجہ بننے والے طبی مسائل کی تشخیص ہو سکے۔ عام صورتوں میں ان سے بچاؤ یا انہیں کم کرنے کے لئے یہ ٹپس مددگار ثابت ہوسکتی ہیں:

٭گیلا کپڑا، ٹھنڈا کھیرا یا ٹھنڈی چمچ کو آنکھوں کے نچلے حصے پر کچھ منٹ کے لئے رکھیں۔ اس سے حلقے اور سوجن کم ہوتی ہے۔

٭تمباکو جسم میں موجود وٹامن سی کی مقدارکو کم کرتا ہے جو کولیجن بنانے کے لئے ضروری ہے۔ کولیجن کی کم مقدار جلد کو کمزور کرتی اور خون کی نالیوں میں خون جمع ہونے کا سبب بنتی ہے۔ ایسا آنکھوں کے نیچے والے حصے میں موجود نالیوں میں ہو جائے تو سیاہ حلقے اور سوجن کا مسئلہ ہوجاتا ہے، اس لیے تمباکونوشی سے اجتناب کریں۔

٭ان کا سبب الرجی ہو تو الرجی کا باعث بننے والے عوامل سے دور رہیں۔ ڈکٹر کی تجویز کردہ دوا باقاعدگی سے استعمال کریں۔

٭نیند پوری کریں اور عمومی صحت کا خیال رکھیں۔

٭سورج کی شعاعیں بھی حلقوں کا باعث بن سکتی ہیں۔ ان سے بچنے کے لئے سن سکرین، سن گلاسز، ٹوپی یا موائسچرائز کی مدد لی جاسکتی ہے۔

٭سونے سے قبل میک اَپ صاف کریں اور آنکھوں کو اچھی طرح دھولیں ورنہ آنکھوں کے نیچے ٹشو متاثر ہو کر سوج سکتا ہے۔

٭سونے کے لئے لیٹیں تو سر کو باقی جسم کے مقابلے میں تھوڑا اونچا رکھیں۔ اس سے آنکھوں کے گرد سوجن نہیں ہوتی۔ اس کے علاوہ سونے سے قبل مشروبات کی مقدار کم کردیں۔

خوراک میں احتیاطیں

٭زیادہ نمکین کھانوں سے جسم میں کہیں بھی سوجن ہو سکتی ہے۔ اس لئے انہیں کھانے سے گریز کریں۔

٭بعض اوقات پانی کی کمی سے آنکھوں کے نیچے سوجن ہو جاتی ہے۔ ایسے میں پانی کی مطلوبہ مقدار پیئیں۔ اگر زیادہ پانی نہ پیا جاتا ہو تو دیگر مشروبات سے اس کمی کو پورا کر لیں۔

٭وٹامن سی کی حامل اشیاء خوراک میں شامل کریں۔ یہ مالٹے، سرخ مرچوں، بروکلی اورسٹرابیری وغیرہ سے حاصل کیا جاسکتا ہے۔

٭حلقوں کا سبب آئرن کی کمی ہو تو آئرن کی حامل اشیاء مثلاً گوشت، دالیں، سبز پتوں والی سبزیاں، کشمش، خوبانی، مٹر، بریڈ، پاستہ اور سیریل وغیرہ کھائیں۔

dark circles and eye bags, how to prevent dark circles and eye bags, causes of dark circles and eyebags, tips to get rid of dark circles and eyebags, shifa news, health, eye and skin care, halkay aur aankhon ki soojan